Yek ji fermandarên Hêzên Parastina Jinên Rojhilatê Kurdistan (HPJ) Sema Kurdistan di derbarê salvegera şehîd Bêrîtan (Gulnaz Karataş) de ji ANF’ê re axivî.
Sema Kurdistan destpêkê di şexsê şehîd Bêrîtan de tevahî şehîdên şoreşê bi rêzdarî bi bîr anî û wiha got, “Bi sekna Şehîd Bêrîtan gav avêtin, têkoşîn kirin û xebatên xwe meşandin, di hemû qadên jiyanê de esasên sereke yên her şoreşgerekî ye. Çawa ku dîrok xwe di her kêliyê de dubare dike, sekin û jiyana heval Bêrîtan jî ji bo me bîreweriyeke ku em di sekn, tevlîbûn û tekoşîna xwe de lêvegerandin çêbikin.Hevala Bêrîtan ji bo me xet û sozeke. Em ê li ser şopa Hevala Bêrîtan heta dawiyê têkoşîneke domdar bidin meşandin. Ji bo vê yekê her tim sekna hevala Bêrîtan temsîliyeta xeta Fermandartiyê ye. Li ser vî esasî berdêlên ku heta niha Tevgera Azadiyê daye li ser xeta fedayîtiyê ya Şehîd Bêrîtan, Şehîd Zîlan, Şehîd Zîlan Pepûle û gelek hevalên din mîna fermandara me Aryen Arê heta roja îro bi saya ked û fedekariya wan hevalan hat û ji vir û şûnde jî ew xet wê her li ser wê mîrasê berdewam bike.
Şehîd Bêrîtan xetek wisa da avakirin ku ji hemû cîhanê re da nîşandan ku dema ku jin bixwaze, dema di rêka azadiyê de gav bavêje, xwe azad dike û bedew dike. Bi terzê jiyan, têkoşîn, fermandartî û şerkirina xwe re ji her kesî re da teysandin. Di heman demê de bi sekna xwe, xeta teslîmkar ya ku teslîmiyetê qebûl dike û koletiyê hembêz dike, şermezar û lanet kir. Di şexsê hevala Bêrîtan de tevahî jin dihatin jiyanîkirin. Bi feraseta di şexsê xwe de azadiya jin bidest bixîne jiyan kir û ji bo xwe kir esasekî bingehîn yê têkoşînkirin û şerkirinê.
‘JI BO HER JINEKÊ PERGALA XWEPARASTIN PÊWÎSTIYEKE BINGEHÎN E’
Fermandar Sema Kurdistanê got ku eger di nava civaka Kurdistanê de ‘Şoreşa Jin Jiyan Azadî’ çêbûye, sedema xwe neqebûlkirina zihniyeta zilamsalar e û wiha dirêjî da axaftina xwe: “Ji ber ku li ser jin feraseta nijadperestî dihate ferzkirin ew şoreş hate despêkirin. Di tevahiya Îran û bi giştî cîhanê de dema ku mirov lê temaşe dike eger ku jin nebin yek û sîstema xwe ya xwe parastinê birêxistin nekin, xwe birêxistin nekin ew zihniyeta ku jin parçe dike û qetil dike, wê her werin berdewam kirin. Di roja îro de wek jin pêwîste em baş bizanibin yê ku em pê re şer dikin ne şexseke, temsîliyeta zihniyeteke qirêj û kevneperest e. Em bi tenê bi şexs û gotinekê re rû bi rû nabin rojane bi hezaran êrîşên ruhî û zihnî li ser jinê têne meşandin. Ji bo ku em li beramberî vê zihniyetê li ber xwe bidin ji bo her jinekê sîstema xwe parastinê pêwîstiyeke bingehîn e. Tenê bi parastina xwe re, dikare bikeve ferqa zanebûn û hebûna xwe.
‘MÎRATEYA KU HEVAL BÊRÎTAN JI ME RE HIŞTIYE HILBIGIRIN’
Wek Hêzên Jinên Rojhilatê Kurdistanê (HPJ) ku parastina tevahiya Rojhilatê Kurdıstan û bi tevahî Îranê dike her çiqas mirov rastî dijwariyên bi vî rengî yên di nava tevahiya qadên jiyanê tê, vê rastiyê dubare dibîne ku di roja îro de em pêwîste ji her demê bêhtir hevgirtî bin, ji her demê bêhtir bizanibin ku pêwîstiya me bi xwebûna me bi xwe û vegera li cewhera xwe heye. Mîrateya ku hevala Bêrîtan ji me re hiştiye wek jin em hevdu bigrin, em rêxistibûna xwe esas bigrin û bi vî rengî em li ser hedefên xwe û li ser dijwariyên ku li pêşberî me têne raberkirin biçin. Di hemî qadên jiyanê de van esasên ku ji dîroka me heya neha ji me re mane, esasên bingehînin ku em bikaribin xwe li ser ava bikin.”
‘SEDSALA 21’AN WÊ BIBE SEDSALA AZADIYA JINÊ’
Sema Kurdistan bang li hemû jinên Rojhilatê Kurdistanê û Îranê kir ku di asta pêvajoya Aştî û Civaka Demokratîk de xwe birêxistin bikin û Rêber Apo bixwînin ku fêmbikin ev pêvajo çima hatiye destpêkirin û wiha got: “Wek jinên Ciwan bi fêmkirina Rêbertî re em çawa dikarin xwedî li berdêlên hatine dayin derbikevin. Ji bo vê yekê bang dikim ku hîn bêhtir Rêber Apo fêm bikin û bixwînin. Wek jin hêza xwe bizanibin û lêbikolin ku çima pêwîstî bi artêşbûna jinê hebû. Li ser vî esasî wekî ku Rêber Apo jî dibêje sedsala 21’an wê bibe sedsala azadiya jinê û ev sedsala azadiya jinê jî wê bi nivîsandina azadiya jinê despê bike. Di vê sedsalê de azadiya jinê wê bi destê jinê bi xwe were nivisandin, bi tenê jinek an jî qadek na ev nivîs bi ked û xwîna gelek hevalên şehîd hatiye nivîsandin û gava wê hatiye avêtin. Di dawiyê de berdewamiya vê nivîsê gel û gerîla bi hev re wê binvisînin û bigihînin encamê. Li ser vî esasê em hewl didin ku bi hemû hêza xwe ya heyî vê salê bikin sala azadiyê.”
