Li herêma Mesakin El Zehriyat a Şamê komek ji 30 çekdarên girêdayî “Ebû Enes” û “Ebû Huzeyfe” êrişî taxê kirin, li welatiyan da û heqaret li wan kir. Çekdaran ji gef li şêniyan xwar ku di demek kurt de malên xwe vala bikin.
Çavkaniyên xwecihî da zanîn ku çekdaran bi qundaqên çekan li ciwanan da, di encamê de 5 sivîl birîndar bûn. Çakaniyan aşkera kir ku hejmarek ji zilam û xortên taxê ji ber êrişan ji taxê reviyan. Ev yek di demekê de ye ku hîn hikumeta veguhêz a Sûriyeyê ji bo rawestandina êrişê tu destwerdan nekiriye.
Çavkaniyan diyar kir ku serkirdeyekî çekdaran gef li şêniyan xwarine û gotine, “Cara bê hûn ê nikaribin heta cilûbergên xwe jî bibin.” Şêniyan gotin ku ev gefên eşkere ne, bi niyeta koçberkirina wan a bi darê zorê ye.
Heman çavkaniyan destnîşan kir ku çekdaran deriyên malan şikandin, telefonên welatiyan birin û ew mecbûr kirin ku kodên li ser telefonan vekirin.
Hêjayî bibîrxistinê ye ku berî demekê kesê bi navê “Ebû Enes” ku di dema dawîn de wekî berpirsê rêbendeke kontrolê hatiye erkdarkirin, li dijî heman herêmê êriş pêk anîbû.
Şêniyên taxê ji dubarekirina senaryoya taxa Someriye û taxên din ên ku piraniya şêniyên wan Elewî ne, tirsa xwe nîşan da.
