Fatma Bostan Unsal destnîşan kir ku geşedanên herêmî Tirkiyeyê teşwîqî çareseriya pirsgirêka Kurd dike.
Fatma Bostan Unsal a ji ANF’ê re axivî, bi bîr xist ku ji sala 1993’yan û vir ve di meseleya Kurd de gelek derfetên cur be cur hatine bidestxistin, lê bi ti rengî bi ser neket û bal kişand ser girîngiya vê pêvajoya salekî.
Fatma Bostan Unsal ragihand ku dewlet divê ji bo aştî û jiyana hevpar gavan bavêje û got, “Di Komîsyona li Meclîsê hatî avakirin de jî rêxistinên civakî yên sivîl dubare dubare behsa van gavan kirine. Pêwîst nake Tirkiye guhertin pir radîkal jî bike, piranî daxwaz jixwe bi pêkanîna hiqûqa heyî ya Tirkiyeyê wê bên bicihanîn. Di komîsyonê de daxwaza bicihanîna biryarên Dadgeha Mafên Mirovan a Ewropayê (DMME) û Dadgeha Zagona Bingehîn (AYM), daxwaza ku herî zêde hatî dubarekirin e.”
Fatma Bostan Unsal bilêv kir ku geşedanên herêmî Tirkiyeyê teşwîqî çareseriya pirsgirêka Kurd dike û got, di vê pêvajoyê de civak divê guhertinên herêmî bi rengekî vekirî bibîne û binirxîne.
Fatma Bostan Unsal ev tişt jî anî ziman: “Eger biryarên DMME û AYM’ê bên bicihanîn, cudakariya li dijî girtiyên siyasî were rakirin, derfet bê dayîn ku girtiyên nexweş û kal rojên xwe yên dawî bi malbatên xwe re derbas bikin, dawî li pêkanîn qeyim were, Qanûna Têkoşîna li dijî Terorê were guhertin û mirov ji ber rewşên jirêzê bi terorê neyên darizandin, wê guhertinên ku bi milyonan mirov li bendê ne û piştgirî didinê pêk bên. Her wiha ev gav dê fikarên li dijî pêvajoyê jî tune bike, baweriyê zêde bike.
Ev tiştên min qalê kirî, dibe ji nişka ve pêk neyên, lê di nava pêvajoyê de dibe. Ez bawer dikin ku mudaxileya îradî ya partiyên siyasî, medya, civaka sivîl yan jî kesên serbixwe wê pêvajoyên civakî diyar bike, guhertinên civakî bîne û Tirkiye wê di vê qonaxa krîtîk de înîsiyatîf bigire, pirsgirêkan di hundir de çareser bike û li herêmê aştiyê pêk bîne.”
