Serokê Giştî yê EMEP’ê Seyît Aslan diyar kir ku divê Komîsyona Hevgirtina Neteweyî, Xwişk-Biratî û Demokrasiyê biçe Girava Îmraliyê û destnîşan kir ku muxatabê çareseriyê Rêber Apo ye û Bahçelî û Erdogan jî vê yekê baş dizanin.
Serokê Giştî yê Partiya Kedê (EMEP) Seyît Aslan ji ANF’ê re axivî û da zanîn ku çawa ew bi salan in naskirina daxwazên neteweyî ya gelê Kurd û çareseriya aştiyane û demokratîk diparêzin, piştgirî didin vê pêvajoyê jî.
Aslan got, “Pevçûnekî ku 45 sal in didome heye. Dîroka pirsgirêkê heye. Gav û nêzîkatiyên ku ji bo çareseriya vê pirsgirêkê tê avêtin, hêja ne. Ez dixwazim vê yekê diyar bikim; ger îro Devlet Bahçelî, Erdogan û burokrasiya dewletê di vê mijarê de hin gavan diavêjin, ev encama têkoşîna azadî û demokrasiyê ya gelê Kurd e. Bi taybet encamên têkokşîna demdirêj a gelê Rojava û mewziyên ku wan bi dest xistine, li Tirkiyeyê jî xuya bû. Eger hûn pirsgirêka Kurd çareser nekin, wê pirsgirêka Kurd we bi awayekî çareser bike. Ji ber vê yekê piştî salên dirêj jî be îro tê dîtin ku ji xeynî muxatabgirtina Rêberê Gelê Kurd Birêz Abdullah Ocalan tu vebijêrkekî din tune ye.
‘DIVÊ PÊVAJO BI AŞTIYÊ BI ENCAM BIBE’
Aslan destnîşan kir ku gavên Tevgera Azadiya Kurd a têkildarî pêvajoya aştiyê pir girîng in û wiha dirêjî da axaftina xwe: “Divê bala xwe bidin van gavan, nirxekî û bersivê bidin. Hê ev pêvajo veneguheriye pevçûn, şer û operasyonê, divê bi awayekî aştiyane çareseriyê pêk bînin. Divê dewlet û desthilatdarî bileztir tevbigerin. Divê gavên bileztir biavêjin.”
‘DIVÊ ZEXTÊ LI DESTHILATDARÎ Û DEWLETÊ BIKIN’
Aslan bi bîr xist ku komîsyonê hê ji xeynî guhdarkirinan tiştekî din nekiriye û da zanîn ku hîna mijarên ku divê werin çareserkirin hene. Aslan îşaret bi pêwîstiya gavên têkildarî girtîgehan, qeyûman, mafê perwerdehiya zimanê dayikê û yên ku çek berdane wê çawa tevlî hawirdorekî demokratîk bibin kir û wiha got, “Hê bersiva gavên gelê Kurd û tevgera siyasî ya Kurd nehatiye dayîn. Divê em vê yekê bibînin. Divê li vir bi esasî zext li ser desthilatdarî û dewletê bê kirin. Ji bo ku gavên leztir bêne avêtin, divê hewldana hemû partî û saziyên siyasî hebe.”
‘MUXATAB ZELAL E’
Aslan destnîşan kir ku muxatab vekirî û zelal in û got, “Ocalan rasterast muxatabê çareseriyê ye. Erdogan û Bahçelî jî vê yekê baş dizanin. Divê muxatab rûnin û li ser pêvajoyê biaxivin. Divê Ocalan derkeve derve û fikrên xwe bi raya giştî re parve bike. Komîsyonê divê zû biryarê bigre, biçe Îmraliyê û bi Ocalan re hevdîtinê bike.”
‘DIVÊ RÊYA EFÛYA GIŞTÎ YA SIYASÎ BÊ VEKIRIN’
Serokê Giştî yê EMEP’ê Seyît Aslan got, “Me her tim anî ser ziman ku divê bi Rêberê Gelê Kurd re hevdîtin bê kirin. Me di her platformê de anî ser ziman divê efûya giştî ya siyasî bê derxistin û her kes fikrên parve bike. Dema ku aliyeke di çûyîna Îmraliyê de bi israr e, zimanê ku parlementerên DEM Partiyê di Meclîsê de diaxivin, hîna wekî ‘zimanê nayê zanîn’ derbasî girtenameyan dibe. Dema ku Dayika Aştiyê xwest di komîsyonê de nêrîn û pêşniyarên xwe bi zimanê dayika xwe bîne ser ziman, xwestin ku bi Tirkî biaxive. Divê ev nakokî ji holê bêne rakirin. Eger demokratîkbûneke çêbibe, divê di seranserê Tirkiyeyê de çêbibe. Em hêvî dikin ku ev pêvajo di dawiyê de bi aştî, wekhevî û pêşwazîkirina daxwazên neteweyî yên gelê Kurd bi encam bibe. Em ê ji bo vê têbikoşin.”
