Tevgera Jinên Azad (TJA) û Meclisa Jinan a Partiya Wekhevî û Demokrasiyê ya Gelan (DEM Partî) di çarçoveya 25’ê Mijdarê Roja Têkoşîna Li Dijî Tundiya Li Ser Jinan a Navneteweyî de bi jinan re civiyan. Hevseroka GIştî ya DEM Partiyê Tulay Hatîmogullari jî beşdarî civîna ku li saloneke dawetê ya li navçeya Şehîtkamîl a Dîlokê hate lidarxistin, bû.
Jinan dirûşmeyên “Jin, jiyan, azadî” û “Civaka bê tundî bi jinên azad pêkan e” berz kirin. Çalakvana TJA’yê Adalet Fîdan di civînê de axivî û got, “Em kolan bi kolan, tax bi tax, gund bi gund bi hev re ne. Me li pirsgirêkên jinan, hewldan û têkoşîna wan guhdar kir. Têkoşîna ku 100 sal in tê meşandin jinan gihandiye astek girîng. Lê zîhniyeta baviksalar hîn jî pirsgirêka sereke ya civakê ye. Jin ji her alî ve bi vê zîhniyetê re rû bi rû dimînin. Divê em li dijî tundiya ku jin pê re rû bi rû dimînin têbikoşin. Tundiya herî zor û xirab şer e; ew ne tenê bi fîzîkî, di heman demê de bi psîkolojîk jî li dijî jinan tê kirin. Ji bo em li dijî vê derkevin divê em komun û rêxistinên xwe ava bikin.”
‘GER EM LI HER DERÊ HILDIBERÎNIN, DIVÊ EM WÊ BI RÊ VE BIBIN’
Tulay Hatîmoğgullari diyar kir ku divê têkoşîna li dijî tundiya li ser jinan bi awayekî rêxistinkirî were meşandin. Tulay Hatîmogullari destnîşan kir ku jinên ku li malê dixebitin bê sîgorta ne û got, “Jin li malê jî dixebitin. Divê dewlet ji bo hemû jinan bi sîgorta bike û dema ku dema wê were divê mûçeya teqawîtbûnê bide. Ger em li her derê hildiberînin, divê em wê bi rê ve bibim.”
‘DI 10 MEHÊN DAWÎ DE 246 JIN HATINE QETILKIRIN’
Tulay Hatîmogullari bal kişand ser tundiya li dijî jinan û qetilkirina jinan û wiha domand: “Di 10 mehên dawî de 246 jin hatine qetilkirin û bi qasî vê hejmarê jî bi awayekî guman jiyana xwe ji dest dane. Tundiya mêran, jinan dixe nav tengezariyê û dihêle xwe bikuje Xizanî, bêkarî û tundiya mêran, kujer in. Ger Peymana Stenbolê û Qanûna Hejmar 6284 bi bandor bihata bicîhanîn, me yê şahidiya ewqas tundiya li dijî jinan nekiriba. Divê em li dijî vê yekê xebatên bi bandor bimeşînin. Budceya 2026’an li Meclisê tê nîqaşkirin û budceya ku ji bo jinan hatiye veqetandin hema hema tineye. Lê hişmendiya serdest a mêran jinan jinana ji nedîtî ve tê.”
‘KOMÎSYONÊ BIRYAREKE DÎROKÎ GIRT’
Tulay Hatîmogullari têkildarî şandeya ku wê diçe Îmraliyê de jî axivî û got, “Ev biryar wekî biryareke dîrokî tê dîtin. Hemû jin beşek ji vê têkoşînê ne û bedelên giran dane. Ev pêvajo ji bo pêşeroja Tirkiyeyê girîng e. PKK’ê bi awayekî erênî bersiva banga birêz Ocalan da. Niha, hêviya me ew e ku komîsyon biçe giravê û qanûnên ku têne hêvîkirin amade bike. Divê êdî jinên girtî tine bin. Em di şexsê Fîgen Yuksekdag, Ayşe Gokkan û Leyla Guven de silavên xwe ji hemû jinên girtî re dişînin.”
Tulay Hatîmogullari anî ziman ku tevî her tiştî jî wê xebat berdewam bike û wiha domand: “Tevî hemû dijberiya li hember pêvajoyê jî, ji bo serketina vê pêvajoyê em ê 7-24 saetan xebatên xwe bidomînin. Kirdeya herî girîng a vê yekê jin in; tevî ewqas îstismara ked, beden û nasnameyê li ser vê axê winda bûne jî dîsa jî ya herî zindî tevgera jinan e. Em ê hîn bêtir xwe birêxistin bikin.”
Jinên ku di civînê de axivîn mînakên tundiya ku di jiyana xwe ya rojane de pê re rû bi rû mane parve kirin û diyar kirin ku têkoşîna li dijî tundiyê tenê bi tevgera jinan a rêxistinkirî dikare were xurtkirin. Civîn bi berzkririna dirûşmeya ”Jin, jiyan, azadî” bi dawî bû.
