Berdevkê Yekîtiya Niştîmanî Kurdistan (YNK) Karwan Gezneyî di kongreyeke ya rojnamevaniyê de ragihand ku bi serokatiya Bafil Talebanî endamên mekteba siyasî ya YNK’ê li hev civiyan. Di civînê de li ser hilbijartin, pêkanîna hikûmetê û avakirina hikûmeta Federal nîqaş kirine.
Karwan Gezneyî destnîşan kir ku deriye wan ji bo hemû gotûbêjan vekiriye û got: “Em dixwazin hikûmet xizmetê ji bo hemû Herêma Kurdistanê bike. Ji bo vê jî pêwîstî bi lihevkirinê heye. Ji bo avakirina hikûmetê em li ser biryarên xwe ne. Em ji bernameya YNK’ê ya ji bo avakirina hikûmetê ya li gel PDK’ê ne poşmanin. Em li bendê ne aliyên din jî poşman nebin.”
Gezneyî bal kişand ser avakirina hikûmeta Federal ya Iraqê û got: “Bexda kûrahiya stratejîk ya herêma Kurdistanê ye. Emê hemû reng û dengê YNK’iyan û dengderan bibin Bexdayê. Emê bi du projeyan tevlî hikûmetê bibin. Projeyek siyasî û yek aborî ye. Ji bo wê bi hêviya ku hemû aliyên Kurdî bi yek deng û yek reng ji bo çareseriya pirsgirêkan biçe Bexda.”
Berdevkê Yekîtiya Niştîmanî Kurdistan (YNK) Karwan Gezneyî anî ziman ku divê erka serokkomariyê ji bo xelkê Herêma Kurdistanê û mafê YNK’ê be û got: “Ji bo vê erkê jî wê namzetê me hebe. Her gava Mekteba Siyasî namzet diyar kir, wê bê eşkerekirin. YNK dixwaze di çarçoveya xizmeta giştî ya gelê Kurd de dixwaze danûstandinên hevpar bike ji bo li Bexda ji bo mafê destûrî yê gelê Kurd şer bike.”
Herî dawî Gezneyî diyar kir ku ew ji hilbijartinê natirsin, baweriya wan bi dengder û gelên wan heye.
