Li girtîgehan binpêkirinên mafan zêde dibin û berdewam dikin, di demeke nêzîk de bi taybetî li girtîgehên herêmên Serhed û Behra Reş girtiyên ku tê de dimînin, bi gef û heqaretan re rû bi rû dimînin. Dîsa di dema sevkên nexweşxaneyê de girtiyên ku pirsgirêk dijîn, daxwaznameyên wan jî nayên qebûlkirin û tên paşguhkirin.
Yek ji wan girtîgehên ku van binpêkirinan lê çêdibin Girtîgeha Sincan a 2’yemîn a Enqereyê ye. Li vir girtiyê bi navê Burhan Şik ji aliyê gardiyanan ve hat derbkirin û ji aliyê midûrê girtîgehê ve jî gef lê hate xwarin. Birayê Burhan Şik ê bi navê Mehmet Şik di derbarê mijarê de axivî û got ku zext û zordarî li girtîgehê berdewam dikin û wan doz vekirine.
PIŞTÎ ÎŞKENCEYÊ GEF LÊ HATE XWARIN
Mehmet Şik diyar kir ku birayê wî ji sala 2016’an û vir ve li girtîgehê ye û 11 sal û 8 meh cezaya wî heye. Her wiha got ku berî cezaya wî were erêkirin, du sal û nîv li girtîgehê maye lê ev dem ji cezaya wî nehat kêmkirin. Tevî ku ew li dijî vê yekê îtiraz kirine jî, neheqî berdewam dike. Mehmet Şik wiha got:
“Birayê min zêdetirî du salan e, tevî ku cezaya wî ya giran a heta hetayê tune be jî, bi awayekî keyfî li hucreya yek kesî tê ragirtin. Pirsgirêkên pir giran dijî; li vir gelek binpêkirinên mafan pêk tên. Meha borî gardiyan hatin menzela wî û wî got ‘Li vir çop tune’, midûrê girtîgehê got ‘Li vir lêgerîna hûr bikin’ û li menzela wî lêgerîn çêbû. Piştî vê yekê pêşî heqaret, paşê jî êrîşa fizîkî lê hat kirin.”
Şik bûyer wiha anî ziman:
“Ji nişka ve pênc gardiyan êrîşî birayê min kirin, hewl dan milê wî bişkînin û zirarê bidin milê wî. Birayê min di wê demê de tu berxwedan nekir, tenê bi dirûşmeyan got ‘Rûmeta mirovahî dê îşkenceyê têk bibe’. Piştî vê yekê du kesan milê wî, du kesan jî lingên wî girtin û heta jêrê lêdan û birin. Li nexweşxaneya ku çûyî, di milê rastê de şikestinek biçûk hate dîtin lê di tomografiyê de ev şikestin nehat dîtin. Ji ber lêdanê gelek birîn li laşê wî çêbûne.”
MIDÛR GEF XWAR: HÛN DIJMINÊ MIN IN
Mehmet Şik diyar kir ku piştî îşkenceyê gef û heqaret berdewam kirine û wan doz vekirine. Wiha domand:
“Me ev îşkence ragihand lê heqaret û gef berdewam dikin. Dîsa dema birayê min birin revîrê, tu sevk bo nexweşxaneyê nehat kirin. Gava me bi wî re hevdîtin kir, fêm kir ku li girtîgehê midûra duyemîn a jin gotiye ‘Hûn dijminê min in’ û gef li wî xwariye. Em wek malbatê li dijî vê kesê û gardiyanan doz vekirine. Di hevdîtina telefonê ya dawî de jî got ku zext û zordarî berdewam dikin. Em dixwazin ev binpêkirin û gef bi dawî bibin. Wezareta Dadê nikare li hemberî van bêdeng bimîne. Divê ev îşkence bi dawî bibin.”
LI HEMBERÎ GIRTIYÊN KU PIŞTGIRÎ DANE DOZ HATE VEKIRIN
Li gorî agahiyên hatin bidestxistin, di dema îşkenceyê de girtiyên din ku dengê Burhan Şik bihîstine û bi dirûşmeyan piştgirî dane wî, li ser wan jî lêpirsîn hatiye destpêkirin. Her wiha mijar ji aliyê Parlamenterê DEM’ê yê Amedê Serhat Eren ve hatiye birin Meclisê û ew jî li pey bûyerê ye.
