Li dijî êrîşên ser Rojava, bangewaziya piştgiriyê ya ku ji aliyê Tevgera Ekolojiya Kurdistanê ya Ewropayê (TEV-EKO) û Tevgera Ekolojiya Mezopotamyayê (MEH) ve hatibû kirin, ji aliyê tevgerên ekolojiyê yên ji cihên cuda yên cîhanê ve hat bersivandin. Çalakvanan bal kişandin ser hê jî metirsiya qirkirinê li ser Rojava heye û bang li raya giştî ya navnetewî kirin ku bêdeng nemîne.
‘ROJAVA NÎŞAN DA KU ROJHILATA NAVÎNEK DIN PEKAN E’
Josep Sabaté, çalakvanê ji Katalonyayê yê Alliance Against Energy Poverty (Îttîfaqa li Dijî Xizaniya Enerjiyê) û Tevgera Parastina Çemê Ebro, bal kişand ser Rojava ku ji bo herêmê pêşerojeke alternatîf pêşkêş dike û wiha got: “Di dema ku şer û wêrankirin li Sûriyeyê didome de, Rojava wekî projeyeke siyasî ya ji binî ve demokrasiyê, azadiya jinê û jiyana hevbeş a di navbera gel û baweriyên cuda de derket holê. Zêdetirî deh sal in Rojava nîşan da ku li ser bingeha xwerêxistinkirinê, wekheviyê û edaleta civakî Rojhilata Navînek din pekan e. Îro ev proje di bin metirsiyeke hebûnî de ye. Ji bilî bombeyan û êrîşên leşkerî, çavkaniyên av û enerjiyê bi awayekî zanabûn têne hedefgirtin. Qutbûna elektrîkê û hilweşandina binesaziya avê, hemû civakan di nav şerê jiyanê de dihêle.
Astengkirina gihîştina av û enerjiyê ne tesadufî ye; ev amûreke şerê ji bo şikandina rêveberiya xweser a demokratîk tê bikaranîn e. Wekî Îttîfaqa li Dijî Xizaniya Enerjiyê em dizanin ku av û enerji ne meta ne, mafên bingehîn in. Ji ber vê yekê em bi gelê Rojava re di nava piştgiriyê de ne. Parastina Rojava tê wateya parastina jiyanê, rûmetê û pêşeroja kolektîf. Divê Rojava neyê terikandin.”
‘HÊ JÎ METIRSİYA QIRKIRINÊ HEYE’
Tevgera Climate Justice ya navendî a li Swîsreyê jî piştgirî da bangewaziya TEV-EKO û MEH’ê. Di peyama dîmenî ya ji aliyê tevgerê ve hat weşandin de ev gotin hebûn:
“Em wekî Tevgera Climate Justice ya Swîsreyê, bi awayekî zelal li dijî şerê ku hikûmeta demkî a Îslamî ya li Sûriyeyê li dijî Rêveberiya Xweser a Demokratîk a Bakur û Rojhilatê Sûriyeyê dimeşîne ne. Ev şer bingeha aborî, ekolojî û civakî ya jiyana gel û xwezaya herêmê ji holê radike. Gelê Kurd û kêmneteweyên din di bin metirsiya qirkirinê de ne. Nêzîkatiya ekolojîk a Rojava îlhamê dide me. Em li Ewropayê vê projeya şoreşgerî diparêzin û bidomînin.”
‘TEVLÎ TÊKOŞÎNA ŞOREŞGERÎ YA ROJAVA BIBIN’
Tevgera People Rising jî di peyama xwe de bangewaziyên zelal ji bo piştgiriya Rojava kirin. Di daxuyaniyê de ev hat gotin:
“Ji 6’ê Çile û vir ve, rêveberiya HTŞ’ê ya bi pêşengiya El-Şara yê serokê berê yê DAÎŞ’ê, êrîşî herêmên xweser ên Hesekê û Kobanê dike. Sed hezaran mirov di bin metirsiya koçberbûn û tunekirinê de ne. Tevgera azadiya jinê ya bi pêşengiya Tevgera Kurd YPJ’ê, zêdetirî deh sal in li dijî DAÎŞ û milîsên piştgirê ji Tirkiye digirin têdikoş in. Îro destkeftiyên demokratîk ên ku ava kirine di bin êrîşeke giran de ne.”
Çalakvanekî People Rising di peyamê de bang li çalakiyê kir û wiha got: “Nameyên ku êrîşkarîya Tirkiye û Sûriyeyê şermezar dikin bişînin, dengê tevgerên azadiya Kurd bilind bikin, piştgiriyê mezin bikin. Tevlî têkoşîna şoreşgerî ya li Rojava bibin. Bijî Berxwedana Rojava! Jin, Jiyan, Azadî! Ji Kurdistan re Azadî!”
‘ROJAVA DI ŞERTÊN ZEHMET DE HATE AVAKIRIN’
Anna Sophie Bachmann, endama Save the Tigris Foundation (Weqfa Parastina Dîcleyê) û parêzvanê avê, di peyama xwe de bal kişand ser Rojava û got ku bi bedelên giran li ser piyan maye:
“Gelê Rojava di şert û mercên pir giran de ji bo rêveberiya beşdar û mafên jinê têdikoşe. Zêdebûna tundiyê li herêmê krîza mirovî ya kûr hîn bêhtir giran dike; ewlehiya av û xwarinê zêde dike û binesaziya sivîlan dixe xetereyê. Em bang li civaka navnetewî dikin ku sivîlan biparêze; avê ne wekî çekê şer, wekî çavkaniyeke hevpar ji bo aştiyê bibîne û polîtîkayên piştgiriyê bike.”
BANGEWAZIYA PIŞTGIRIYA ENTERNASYONEL JI BO ROJAVA
Pouria Amirshahi, parlamenterê Partiya Kesk a Fransayê û damezrînerê The Dam Project, bal kişand ser girîngiya piştgiriya navnetewî û wiha got:
“Rojava û gelê Kurd di pêşengiya têkoşîna li dijî DAÎŞ’ê de bûn û nirxên azadî, wekheviya jin-mêr û demokrasiyê parastin. Îro ev nirxên gerdûnî di bin metirsiyê de ne. Em nikarin destûrê bidin ku Kurd bên terikandin û sozên hatine dayîn bên jibîrkirin. Divê em piştgiriya navnetewî ji gelê Kurd û bi taybetî ji Rojava re mezin bikin.”
Her wiha Waterkeeper Iraq (Parêzvanên Avê yên Iraqê) li Başûrê Kurdistanê, ji bo bangewaziya TEV-EKO û MEH’ê li Silêmaniyê meşeke mezin amade dikir û dîmenê ku tê de daxwaznameyên xwe nîşan didin weşand û piştgirî da kampanyayê.
