Rojnamevan Banû Guven mijara şandina heyeta komîsyonê ji bo Îmraliyê nirxand û got, “Abdullah Ocalan berê jî weke muxatabekî rewa yê siyasetê hate qebûlkirin.” Banû Guven destnîşan kir ku çûyîna wekîlên hilbijartî yên ji meclîsê nîşan dide ku di muxatabiyê de gaveke din hatiye avêtin.
Banû Guven anî ziman, ji ber ku hevkarên desthilatdariyê di nava vê heyetê de cih girtin, girîngiya biryarê zêdetir bû û got, “Girîng e ku komek ji wekîlên ji aliyê milet ve hate hilbijartin çû wê derê.”
Banû Guven tevlînebûna CHP’ê ya li nava heyeta komîsyonê li ser du faktoran nirxand. Rojnamevan Banû Guven diyar kir ku CHP di dema dawî de bi yek ji operasyonên herî mezin ê siyasî re rû bi rû ye û got, partî li hemberî qeyûman têdikoşe, her wiha li hemberî zor û zehmetiyên ji ber girtina namzetê xwe yê Serokkomariyê li ber xwe dide. Banû Guven ragihand ku vê sedemê bandor li biryara CHP’ê kir, ku bi AKP û MHP’ê re di nava heyetê de cih bigire, wê zorê lê bike.
Banû Guven her wiha ragihand ku fikara çûyîna dengên neteweperest ji bo IYI Partî yan jî partiyên din, sedemeke din e ku bandor li wergirtina vê biryarê kiriye.
Banû Guven got, gelekî girîng e ku heyetek ku hevparên desthilatdariyê di nav de bû çû Îmraliyê, lê belê tevlîbûna endamên CHP û Koma Yenî Yolê wê bêhtir tevkarî li pêvajoya çareseriyê ya yekbûyî bikira.
