Mirina Dîlan Karaman ku 11’ê Mijdarê li beşa tedawiya lezgîn a li nexweşxaneyê jiyana xwe ji dest da, weke mirina ji ber ‘krîza dil’ hate ragihandin. Lê belê rêxistinên jinan diyar kirin ku mirineke bi guman e.
Tevgera Jinên Azad (TJA) got, “Em ê ti carî nehêlin ku mirina bi guman a hevrêya me Dîlan di tarîtiyê de bimîne.”
TJA’yê diyar kir ku ew tundiya bi rêk û pêk û bêcezahiştinê qebûl nakin û wê pêvajoyê ji nêz ve bişopînin.
Navenda Mafên Jinan a Baroya Amedê jî ragihand ku piraniya mirinên bi guman weke “xwekuştin” an jî “mirina ji nişka ve” têne ragihandin, pêwendiya vê yekê bi polîtîkaya bêcezahiştinê re heye û xwest lêpirsîneke berfireh têkildarî mirina Dîlan Karaman de bê kirin.
Meclîsa Jinan a DEM Partiyê jî destnîşan kir ku mirina jinan a bi guman polîtîk e û got, “Heta ku mijar ronî bibe em ê şopdarê pêvajoyê bin.”
