Civaknas û Ekofemînîst Prof. Laura Corradi têkildarî mijarên azadiya jinan, tundiya li ser jinan, paradîgmaya azadiya jinan a ji aliyê Rêber Apo ve hatiye pêşxistin ji ANF’ê re axivî. Prof. Laura Corradi di destpêka axaftina xwe de anî ziman ku jin bi her cure tundiyê re rû bi rû dimînin û ev yek anîn ziman: ‘’Ji ber ku me roja 25’ê Mijdarê weke roja Têkoşîna Li Dijî Tundiya Li Ser Jinan birêxistin kiriye, di mijara tundiya li ser jinan de zêdetir hişmendî heye. Lê belê rewşa tundiya li ser jinan neguheriye, gelek neguheriye. Hê jî gelek tundî heye. Tundiya nava malbatê, tundiya zayendî, tundiya fîzîkî û tundiya psîkolojîk. Gelek jin jî ji aliyê dergistiyê xwe berê yan jî hevalê xwe yê berê ve tên qetilkirin. Yanî di rastiyê de gelek tişt neguheriye. Weke siyasî hişmendî zêde bûye lê belê hê jî di hemû rewşan de- siyasî, civakî, li cihê kar, li dibistanê û li her derî- jin di bin gefa tundiyê de ne.’’
‘MEZINTIRÎN MEXDÛRÊN ŞER Û MILÎTARÎZMÊ JIN IN’
Prof. Laura Corradi piştre bal kişand ser bandorên şer, milîtarîzm û komkujiya ekolojîk ên li ser jinan û got: ‘’Di rastiyê de, di nava şerekî de tundiya li ser jina tim zêde dibe. Hemû cureyên tundiyê zêde dibin, lê belê bi taybetî tundiya li ser jinan zêde dibe. Di rewşeke krîzê de, di dema bobelatên ekolojîk, krîzên civakî de bedêlên herî giran jin didin. Di van rewşan de zêde serî li tundiyê tê dayîn. Gelek nexweşiyên ji ber bombeyanî çekên kîmyewî û çekên nukleerî derdikevin holê. Ji ber vê yekê milîtarîzma zêde tê wateya şerê zêde û ev yek jî tê wateya zêdebûna tundiya li ser jinan. Ev hêman hemû bi hev ve girêdayî ne.’’
‘OCALAN TÊKARIYÊ LI TEORIYA FEMÎNÎST DIKE’
Laura Corradi di dewama axaftina xwe de bal kişand ser analîzên Rêber Apo yên têkildarî azadiya jinan û wiha pêde çû: ‘’A rastî, xebat û nivîsên Abdullah Ocalan yên beriya girtîgehê û xebatên li girtîgehê ku ev zêdetirî 25 salan e têkariyeke mezin li analîzkirina kolekirina jinan dike. Diyar kiriye ku ev yek ji ku hatiye û di xalên diyar ên dîrokê de jin çima hatine kolekirin. Û teoriya sosyolojiya azadiyê ya Ocalan, azadiya jinan weke xala yekemîn di nava xwe de dihewîne. Di gel ku gelek şoreşger azadiya jinan di dawiya pêvajoya şoreşê de bi cih dike jî Abdullah Ocalan azadiya jinan di destpêka pêvajoya şoreşê de bi cih dike. Abdullah Ocalan li dîrokê dinêre û bi awayekî eşkere diyar dike ku dema hemû pirsgirêkên din tên çareserkirin divê meseleya ku di destpêkê de were çareserkirin, meseleya jinan be. Li gorî Abdullah Ocalan azadiya civakê li gel azadiya jinan pêkan e. Ev yek jî pir girîng e û balê dikşîne. Ji ber wê yekê di çarçoveya teoriya femînîst de têkariyeke zêde kiriye û divê em ji bo vê yekê spasiyên xwe li Abdullah Ocalan bikin.’’
‘JINÊN KURD PÊŞENGIYÊ JI TÊKOŞÎNA FEMÎNÎST RE DIKIN’
Civaknas û Ekofemînîst Prof. Laura Corradi diyar kir ku jinên Kurd ji tevgera femînîst a li çapa cîhanê re pêşengiyê dikin û xweparastinê weke ruheke jinê ya kolektîf dibînin.
Prof. Laura Corradi destnîşan kir ku xweparastin têkildarî xwerêxistinkirinê jî ye û got, “Divê di navbera jinan de bawerî jinûve were avakirin. Bawerî, ji xwe bawerbûn, xwerêxistinkirin û xweparastin… Ev encex bi jiyaneke azad re dikare bi ser bikeve. Ev encex bi pratîkê dikare bi ser bikeve; ne bi teorî, gotin û nivîsê. Gundê Jinwar a li Rojava tê bîra min; ew cihê ku jin xwedî derfetê bi tena serê xwe jiyankirinê ne… Li gorî min ev pêşketin hemû çavkaniya xwe ji hêza mezin a Abdullah Ocalan daye jinan digire.”
Laura Corradi ev tişt jî got, “Ez li zanîngehê têkildarî zanist û zayenda civakî ders didim û nîvê refa min xwestin tezên xwe yên qedandinê li ser jineolojiyê çêbikin; ji ber ku radîkaltiya têgeha jineolojiyê fêm kirin. Jineolojî tevkariyê li tevgera femînîst a kûreyî dike; ji ber ku jineolojî pratîkek ji mêtingeriyê qut e. Pratîkeke ekolojîk a jinûvehilberandinê ye. Lewma tevkariyeke pir mezin e û li gorî min beşekî mezin ê tevgera femînîst a kûreyî ji tevgera Kurd û jineolojiyê îlhamek mezin wergirtiye.
Ez piştevaniyê çawa dinirxînim? Di rastiyê de li gorî min ev ji piştevaniyê hîn zêdetir e. Erê, piştevanî ye lê di heman demê de ev e: Mesele tişta ku em ji bo jinên Kurd dikin, ne tenê ji bo jinên Kurd e. Bi taybetî ji bo wê yekê ye ku em dikarin di nava tevgerên xwe de çawa mezin bibin, çawa pêş bikevin û ji bo vê em amûran bi dest bixin û bi zane bibin. Lewma bi rastî jî pir girîng e. Ez hêvî dikim ku komên din ên femînîst ên herêmî jî yên ku hîna jineolojî û tevgera jinên Kurd nas nekirine, vê şêwazê fikirîn û pratîkê nas bikin û bi hev re pratîk pêş bixin.”
‘OCALAN JÎ PIR GIRÎNGÎ DAYE HEQÎQETÊ’
Prof. Laura Corradi di dawiya axaftina xwe de anî ziman ku li her devera cîhanê zexta li ser jinan dewam dike û got, “Hêvî pir kedê dixwaze. Ez li zanîngehê ders didim û di heman demê de aktîvîstek im. Ez têkildarî azadiyê ders didim, têkildarî heqîqetê perwerde didim; ji ber ku bi rastî jî heqîqet pir girîng e. Abdullah Ocalan jî pir girîngî daye heqîqetê. Eger em xwe negihînin heqîqetê û heqîqetê nebêjin, em bi ser nakevin. Lewma hêvî bi têkoşînê re girêdayî ye.”
