Bi malvaniya Şaredariya Bajarê Mezin a Amedê û pêşengiya Komeleya Akademiya Sînemayê ya Rojhilata Navîn û Sinebîrê 3’yemîn Festîvala Filman a Amedê, bi dirûşmeya ‘Cîhan bi rêya çîrokan tê ba hev’ dewam dike.
Di festîvalê de 84 filmên ku li ser çand, xweza, bîr û zimanê dayikê hatine amade kirin tên nîşandan. Her roj bi sedan kes beşdarî festîvalê dibin. Ji ber ku film ji çîrokên rastîn hatine amade kirin, ev yek hê bêhtir bala beşdarvanan dikişîne. Yek ji filmên ku di 13’yê Kanûnê de dê were nîşandan kurtefilma bi navê Sîtav e.
Film dema qedexeyên derketina derve li navçeya Sûrê ya Amed a di sala 2015’an de nîşan dide. Çîrok serpêhatiyên du xwişkan Bêrîvan û Hêlîn vedibêje. Di vê filmê de behsa bandora şer a li ser bîr û zarokan tê kirin.
‘FILM BI KEDEKE KOLEKTÎF HATE AMADEKIRIN’
Derhêner Dîlan Tofik, diyar kir ku Sîtav yekem kurtefilma ku wê amade kiriye û got ku Sîtav bi piştgiriya saziyên li Amedê û kedeke kolektîf hatiye amadekirin. Dîlan Tofik, anî ziman ku wan di dema nivîsandina senaryo û kişandina film de gelek zehmetî kişandine, lê bi hevgirtinê van pirsgirêkan derbas kirin. Dîlan Tofik got ku zehmetiyên aborî jî bi vî rengî hatine çareserkirin.
Dîlan Toftik, anî ziman ku film çîroka du xwişkên ku li Sûrê dijîn vedibêje û da zanîn ku film şopên bûyerên hatine jiyîn ku di bîrê mirovan de mane nîşan dide. Dîlan Tofik got ku film hem çîrokên takekesî û hem jî bîranîna kolektîf a Sûrê nîşan dide.
Derhêner Dîlan Toftik, diyar kir ku filma Sîtav dema qedexeyên derketina derve yên ku di sala 2015’an de li Sûrê hatine ragihandin, nîşan dide. Dîlan Toftik, da xuyakirin ku film serpêhatiyên malbateke ku ji ber şer neçar maye koç bike û zehmetiyên ku zarok di vê pêvajoyê de pê re rû bi rû mane vedibêje. Dîlan Tofik got, “Di dawiya çîrokê de zarok vedigerin malê û di nav kavilan de li bîranînên xwe digerin.”
‘LI KURDISTANÊ ZAROK ZÛ MEZIN DIBIN’
Dîlan Toftik, anî ziman ku zarokên li Kurdistanê ji ber polîtîkayên şer neçar in ku zû mezin bibin û got, “Neçar dimînin li dijî van polîtîkayan li ber xwe bidin. Ne tenê zarok di heman demê de jin, ajal û xweza jî li ber xwe didin. Di filmê de zarokek ku bi kamerayê kêşanê dike heye. Ew kamera tê wateya bîra wan. Dema ez li bîranînên xwe dinêrim, dibînim ku heman tişt min jî jiyane. Min xwest bandora şer a li ser zarokan û siberoja wan nîşan bidim.”
Dîlan Toftik, her wiha behsa rola sînemayê di pêvajoya aştiyê de kir û got ku di pêvajoyeke ku behsa aştiyê tê kirin de parvekirina çîrokan girîng e. Dîlan Toftik, diyar kir ku filma Sîtav wêraniya ku ji ber şer çêdibe û hewcedariya aştiyê nîşan dide û anî ziman ku divê sînema di avakirina aştiyê de roleke çalak bilîze.
