Yek ji welatparêzên têkoşîna azadiyê ya Kurd Ehmed Reşad, hevdîtinên xwe yên salên berê yên bi Rêber Apo re vegot û destnîşan kir ku gelê Kurd di qonaxeke nû re derbas dibe. Reşad bi gotina “Êdî ew ne Kurdên berê ne û ew ê bi bangên Rêber Apo re bigihêjin serketinê” biryardariya gel anî ziman.
Ehmed Reşad diyar kir ku yekem car di 15’ê Tebaxê de li Akademiya Mahsûm Korkmaz a Lubnanê bi Rêber Apo re rû bi rû hevdîtin kiriye û got ku ev hevdîtin di jiyana wî de bûye qonaxeke guhertinê. Reşad, wê kêliyê bi van gotinan vedibêje, “Di şahiya 15’ê Tebaxê de li Akademiya Mahsûm Korkmaz min Rêber Apo dît. Ji bo min ew roj weke mîladekê bû.”
Reşad anî ziman ku ev hevdîtin ji bo wî weke jinûve jidayikbûn bû û destnîşan kir ku hevdîtina wan a duyemîn di sala 1992’yan de pêk hatiye.
Reşad diyar kir ku gotûbêjên ku bi Rêber Apo re kirine cîhana wî ya ramanê bi temamî guherandiye û ruhê têkoşînê bi van hevokan vegot, “Beriya dîtina Rêber Apo û derketina Tevgera Azadiyê, haya me ji hebûna me nebû. Em mirî bûn… Bi dîtina Rêber Apo re me sozê xwe da û em li ser wê esasê tevlî xebatan bûn.”
Reşad anî ziman ku ramanên Rêber Apo di nava hêzên dewletê de tirsê çêdike û sedema vê yekê wiha vegot, “Desthilatdarî ji ramanên Rêber Apo ditirse. Ji ber ku ramanên Rêber Apo rastiyê desthilatdariyê eşkere dike û dawî li desthilatdariya wan tîne.”
Reşad her wiha da xuyakirin ku têkoşîn tevî komplo û zextan jî didome û got, Rêber Apo bi mînakên dîrokî xîtabî hemû gelan dike.
Reşad da zanîn ku Kurd ketine qonaxeke nû û got, “Rêber Apo banga aştiyê kiriye. Divê êdî dewlet jî gavan biavêje. Bila her kes bizanibe ku êdî Kurd ne Kurdên berê ne. Navnîşana çareseriyê Rêber Apo ye. Rêya serketinê tenê li Îmraliyê ye.”
