Bi pêşengiya Kongra Star, bi sedan jin bi daxwaza azadiya fîzîkî ya Rêber Apo meşek li bajarê Hesekê li dar xist. Jinên ji bajarên Hesekê, Til Temir, Şedadê, Hol û Dirbêsiyê beşdarî meşê bûn.
Meş bi dirûşma “Bi rihê komînal û civaka demokratîk em ê bi Rêber Apo re azad bijîn” ji çerxerêya Kevokê ya taxa Til Hecer heya çerxerêya Şehîd Serhed a taxa Miftî dewam kir. Di meşê de pankartên bi nivîsên “Jin, Jiyan, Azad wê mafê hêviyê pêk bîne”, “Bi felsfeya Jin, Jiyan, Azadî em ê Sûriyeyeke demokratîk ava bikin” hatin vekirin. Wêneyên Rêber Abdullah Ocalan jî hatin hildan û bênavber dirûşmên “Bê serok jiyan nabe” û “ji Rêberê neteweyî re azadî” hatin berzkirin.
Meş li çerxerêya Şehîd Serhed veguherî mîtîngê. Li vir endama Koordînasyona Kongra Star Xalide Botî axivî û rola Rêber Abdullah Ocalan di azadkirina jinan de vegot.
Xalide Botî anî ziman ku tevî 27 sal di ser ragirtina Rêber Apo di girtîgeha Îmraliyê re derbas bûn, lê heya niha ji mafê hêviyê bêpar e. Her wiha bi bîr xist ku tevî banga Aştî û Civaka Demokratîk a ku Rêber Apo di 27’ê Sibata îsal de kiribû jî lê dewleta Tirk heya niha tu gav neavêtiye.
Xalide Botî di dawiya axaftina axaftina xwe de diyar kir ku jin dê heya pêkanîna azadiya fîzîkî ya Rêber Apo li qadên têkoşînê bin.
Endama Koordînasyona Kongra Star a bajarê Holê Bedriye Mihemed jî got, banga Aştî û Civaka Demokratîk nexşeya pêşerojê de diyar dike û ev li gotinên xwe zêde kir “Dewleta Tirk li hemberî banga aştiyê tu gav nevêtiye û mafê hêviyê ku di qanûnên navneteweyî de hatiye destnîşankirin bi cih neaniye.”
Bedriye Mihemed wiha dawî li axaftina xwe anî “Em bi sekna jina azad li vir in da ku piştrast bikin ku em ê azadiya fîzîkî ya Rêber Apo bikin armanca pêşîn a têkoşînê.”
Mîtîng bi berzkirina dirûşmên “Bê serok jiyan nabe” bi dawî bû.
