Li gorî nûçeyên di çapemeniya Emerîkayê de hatin weşandin, Washingtonê gelek leşker û alavên leşkerî ji herêmê re şandiye. Ev rageşî di çarçoveya enerjî û petrolê de hîn kûr dibe.
Li gorî New York Timesê, rojên dawî herî kêm 16 balafirên veguhestina leşkerî yên mezin ên C-17 ên DYE’yê di navbera baregehên DYE û Porto Riko de firiyan.
Wall Street Journalê jî ragihand ku C-17’an leşker û alavên leşkerî birine, her wiha li herêmê herî kêm 10 balafirên leşkerî yên V-22 Osprey hatine bicihkirin. Ev zêdekirina leşkerî kapasîteya operasyoneke hewayî yan jî bejahî ya DYE’yê ya li hemberî Venezuelayê xurt dike.
Rêveberiya Donald Trump dema dawî bêyî ku delîlekê pêşkêş bike bi hinceta qaçaxçitiya narkotîkê li peravên Venezuelayê êriş bir ser hin keştiyan. Trump her wiha bi rengekî eşkere anî ziman ku ew dikarin êrişa hewayî bibin ser hedefên bejahî yên li Venezuelayê.
NAVENDA KRÎZÊ: PETROL
Venezuela xwedî rezervên herî mezin ên petrolê yên cîhanê ye, lewma petrol weke mijara piştperdeya rageşiyê tê dîtin. Şîrketa petrolê ya DYE’yê Chevron yekane şîrketa biyanî ye ku li derveyî pêkanînên Washingtonê hatiye hiştin û li Venezuelayê karê petrolê dike.
NERAZÎBÛNA VENEZUELAYÊ: ŞANTAJA HERÎ MEZIN A DÎROKA ME
Venezuela DYE’yê sûcdar dike ku bi rengekî eşkere hiqûqa navneteweyî binpê dike. Nûnerê Daîmî yê Venezuelayê yê li Neteweyên Yekbûyî Samuel Moncada li Konseya Ewlekariyê ya Neteweyên Yekbûyî axivî û anî ziman ku armanca Washingtonê hilweşandina rêveberiya Nicolas Maduro û desteserkirina petrola welêt e.
Moncada got, “DYE weke hêzeke welê tevdigere ku teslîmbûnê li Venezuelayê ferz dike û di rewşeke berevajî de gafa êrişeke çekdarîd ixwe. Ev yek di dîroka me de şantaja herî mezin e ku em lê rast hatine.”
