Çekdarên girêdayî hikumeta veguhêz a Sûriyeyê duh bi şev careke din êrîşî taxên Şêxmeqsûd û Eşrefiyê yên Helebê kirin.
Hêzên Ewlekariya Hundirîn ên Helebê dîmenê êrîşa li ser benda kontrolê ya hêzên wê ya derdroa çerxerêya Şîhan weşand û daxuyaniyek da.
Di daxuyaniyê de hate gotin “Ev dîmen îsbat dike ku komên girêdayî hikumeta Şamê bi guleyên RPG êrîşî benda kontrolê ya Hêzên Ewlekariya Hundirîn a derdora çerxerêya Şîhanê ya Helebê dike. Ev dîmen îdîayên ku dibêjin hêzên me berpirsên destpêkirina êrîşê ne, derew derdixe.”
22’yê Kanûna 2025’an jî çekdarên girêdayî hikumeta veguhêz a Sûriyeyê êrîşî Şêxmeqsûd û Eşrefiyê kiribû. Di encamê de jinek şehîd bû, 19 sivîl û 6 endamên Hêzên Ewlekariya Hundirîn jî birîndar bûn. Bi navbeynkariya hin aliyan lihevkirinek li ser agirbest hate ragihandin. Hat ragihandin ku lê komên girêdayî hikumeta veguhêz ku li gorî lihevkirinê tev nagerin û agirbestê binpê dikin.
