Bendava Tişrînê, ji ber girîngiya xwe ya stratejîk, demek dirêj bû hedefa hêzên dagirker. Gelê herêmê bi mehan ji bo parastina bendavê nobet girtin. Di yek ji van nobetan de Hêza û hevjînê wê Edhem ên ji Kobanê tevlî dibin. Hêza keça xwe ya 8 mehî li cem meta wê dihêle û ber bi Bendava Tişrînê ve diçe. Lê belê, Hêza û Edhem di êrîşeke bi balafirên bêmirov a dewleta Tirk a li ser bendavê de şehîd bûn. Ji wê rojê ve malbat xwedî li keça biçûk a Hêza derdikeve.
Dayika şehîd Hêza Zelîxa Mihemed ji ANF’ê re axivî û behsa biryardarî û fedakariya keça xwe kir.
Zelîxa Mihemed got, “Keça min Hêza, pir bihêz bû. Ew her tim di xwendina xwe de serketî bû, her tim di pola xwe de di rêza yekem de bû. Piştî zewacê û avakirina malbata xwe jî, wê fedakariya xwe berdewam kir. Wê biryar da ku tevlî nobeta li bendavê bibe. Keça xwe ya 8 mehî li dû xwe hişt. Her sibeh ew bi min re diaxivî, wêneyên Tala ji min re dişand. Lê wê rojê bersiva telefona min neda û ji wê gavê û pê ve min fêm kir ku tiştek qewimî ye.”
Zelîxa Mihemed, kêliya ku keça wê şehîd bû wiha vegot, “Tiştê ku me nedizanî ew bû ku ev rêwîtiya wê ya dawî bû. Tabûta keça min li ber min bû. Wê kêliyê her tişt pir zelal bû, Hêza jiyana xwe feda kiribû da ku bendavê biparêze. Ew ji bo siberoja me û siberoja bi hezaran kesan li wir bû.”
Dayika Hêza fedakariya keça xwe û armanca wê ya ji bo parastina bendavê bi van gotinan vegot, “Hêza jinek wêrek bû. Ew ne tenê ji bo ewlehiya xwe, di heman demê de ji bo parastina bendav, av, elektrîk û erdê jî li wir bû. Bi hezaran kes li pey wê çûn, bendav parastin. Ev ji bo me windahiyek mezin e, lê wêrekiya wê dê ji bo nifşên siberojê bibe mînak.”
Ev bûyera li Bendava Tişrînê careke din biryardariya gelê herêmê ya berxwedanê û fedakariya ciwanan nîşan dide. Ciwanên mîna Hêza û Edhem jiyana xwe xistin xeterê da ku bendava Tişrînê biparêzin.
