Li gorî agahiyên ewil ên ji herêmê hatine, hate ragihandin ku teqîn di heman demê de li gelek cihan pêk hatine. Şahidan diyar kir ku li balafirgeha leşkerî ya li navenda bajêr La Carlote û li derdora Fuerte Tiunayê ku yek ji baregeha sereke ya leşkerî ye, teqîn çêbûne. Di dîmenên ku li ser medyaya dijîtal hatine parvekirin de tê dîtin ku li her du cihên berbehs agir û dû bilind dibin.
Hate ragihandin ku piştî teqînê li hin taxên Caracasê ceyran qut bûye, li ser bajêr balafirên şerî firiyane.
Geşedan, di dema zêdebûna rageşiya di navbera Washington û Caracasê de rû da. Rêveberiya DYE’yê di demên dawîn de li Karayîbê bi hinceta ‘’têkoşîna li dijî tiryakê’’ êrîşên li ser keştiyên ku ji Venezuelayê derdiketin, zêde kiribûn. Rêveberiya Trump, Serokdewletê Venezuelayê Nicolas Maduro bi têkiliya li gel bazirganiya tiryakê û çeteyên sûcî tawanbar dike.
Hikûmeta Venezuelayê jî dibêje ku pêngavên dawîn ên DYE’yê bi armanca hilweşandina rêveberiya Maduro û kontrolkirina çavkaniyên petrolê yên welêt tên avêtin.
Hê ji aliyê Wezareta Parastinê ya DYE’yê û CIA’yê ve daxuyaniyek nehatiye dayîn û têkildarî bîlançoya teqînên li Caracasê jî agahiyeke ku hatiye piştraskirin nehatiye parvekirin. Di wêneyên ku ji aliyê Reutersê ve hatine parvekirin de tê dîtin ku li paytext Caracasê agir û dû bilind dibin.
