Wezîrê Karûbarên Derve yê DYE’yê Marco Rubio, ragihand ku Serokê Dewletê yê Venezuelayê Nicolas Maduro ji aliyê DYE’yê ve hatiye binçavkirin û ji bo darizandinê birine welêt.
Senatorê Komarparêz ê DYE’yê Mike Lee, di daxuyaniya xwe ya li ser X’yê de ev tişt gotin, “Marco Rubio ji min re ragihand ku Maduro ji aliyê personelên DYE’yê ve hatiye binçavkirin û ji bo darizandinê birine DYE’yê.” Lee, diyar kir ku Rubio gotiye destwerdana leşkerî ji bo parastina hêzên ku operasyona girtinê pêk tînin, hatiye kirin.
Lee, her wiha destnîşan kir ku Rubio jê re ragihandiye ku ji ber ku Maduro niha di bin çavdêriya DYE’yê de ye, ne hewce ye ku li Venezuelayê pêngaveke leşkerî ya din were kirin.
NÎQAŞA DESTÛRÎ
Senator Mike Lee, di daxuyaniya berî vê de bingeha destûrî ya vê destwerdanê bêyî ragihandina şer an desthilata karanîna hêza leşkerî pirsîbû.
Her çend nezelaliyek derbarê ka Maduro bi rastî di bin çavdêriya DYE’yê de ye an na de didome jî, çav li rêye ku daxuyaniyên fermî ji Washingtonê bên dayîn. Ev pêşveçûn mîna qonaxek krîtîk di rageşiya di navbera DYE û Venezuelayê de tê hesibandin.
