Raportora Taybet a Îranê ya NY’ê Mai Sato, têkildarî protestoyên rojên dawîn ên li Îran û Rojhilatê Kurdistanê daxuyaniyek da û fikarên xwe yên têkildarî zêdebûna tundiyê anîn ziman. Sato, ragihand ku raporeke piştrast standiye ku di protestoyên dawîn de 8 kesan jiyana xwe ji dest dane.
PROTESTO BELAV BÛNE GELEK BAJARAN
Welatiyên ji beşên cuda yên civakê beşdarî protestoyên berfireh ên li Îran û Rojhilatê Kurdistanê belav bûne gelek bajaran dibin. Çalakiyên ku li hemberî şert û mercên aborî yên xirab dest pê kirin, li gel mudaxeleya tund a hêzên rejîmê li gelek bajaran veguherîne bûyerên tundiyê.
‘’EM RAPORÊN ENDÎŞEDAR DISTÎNIN
Raportora Taybet a Îranê ya NY’ê Mai Sato, li ser hesabê xwe yê medyaya dijîtal daxuyaniyek da, diyar kir ku ew xwepêşandanan ji nêz ve dişopînin û îfade kir ku ew raporên têkildarî ku şer û pevçûnên di navbera xwepêşander û hêzên ewlehiyê de zêde bûne û belav bûne seranserê welêt.
Mai Sato bi awayekî eşkere bang li rayedarên Îranî kir ku divê ew rêzê li azadiya raman û xweîfadekirinê, lihevkombûna aşitiyane û mafên xwebirêxistinkirinê bigirin. Her wiha Sato diyar kir ku divê hêzên ewlehiyê li dijî xwepêşanderan serî li hêza zêde nedin.
‘’DIVÊ TUNDIYA SALA 2022’YAN XWE DUBARE NEKE’’
Her wiha Sato di daxuyaniya xwe de bal kişand ser bûyerên tundiyê yên giran ên di serhildana sala 2022’yan de, diyar kir ku divê heman binpêkirin dubare rû nedin û anî ziman ku diyarkirina daxwaz û nerazîbûnan mafekî sereke ye.
