Îro piştî nimêja înê, Konra Îslama Demokratîk û oldaran, der barê êrişên li ser taxên Şêxmeqsûd, Eşrefiyê û Benî Zêd daxuyaniyek li seranserê kantona Cizîrê dan.
Daxuyanî li Mizgefta Zenilabidîn li Qamîşlo ji hêla cîgirê hevserokatiya kongreyê Mazen Mihemed Harûnî, li Mizgefta Selahedîn li Amûdê ji hêla Şêx Mihemed El Qadirî, li Mizgefta Mela Ehmed li Tirbespiyê ji hêla serokê meclisa olî ya bajêr Mela Mihemed Hesen, li Mizgefta Elî ibn Ebî Talib li Girkê Legê ji aliyê Şêx Wael Derşawî, li Mizgefta Mela Cezîrî li Dêrikê ji aliyê Şêx Masûm Derşawî, li Mizgefta Abdullah li Tel Hemîs ji aliyê endamê kongreyê Şêx Taha Hesen, li bajarê Hesekê li pêşiya Mizefta El Nabulsî ji hêla endamê kongeryê Mistefa Elî Ebdo, li bajarê Til Temir li mizgeft mezin a bjêar ji hêla hevserokê kongreyê li bajêr Mehmûd Ebdilezîz û li bajarê Holê li mizgefta El Rehman ji hêla Şêx Ibrahîm El Sultan ve hat xwendin.
Di daxuyaniyê de êriş û komkujiyên li taxên Şêxmeqsûd, Eşrefiyê û Benî Zêd ên Helebê li dijî sivîlên bêguneh tên kirin şermezar kir û tobarankirina deverên niştecihbûnê û terorîzekirina jin û zarokan wekî sûcekî ku ji hêla şerîeta îslamî û hem jî ji hêla exlaqî ve qedexe ye, bi nav kir.
Daxuyaniyê diyar kir ku her çalakiyek leşkerî ku bibe sedema kuştina sivîlan an jî wan têxe xeteriyê, kiryarek êrişkar a heram e û gunehek giran e û berpirsyariya wan sûcan jî dikeve ser kesên ku wê pêk tînin, piştgirî didin wê, an jî plan dikin.
Daxuyanî her wiha dewleta Tirkiyeyê ji hêla qanûnî û exlaqî ve ji ber destwerdanên xwe yên leşkerî yên berdewam û piştgiriya xwe ya ji bo komên çekdar ên ku êrişî sivîlan dikin berpirsiyar girt.
Her wiha hat gotin ku ev pêkanîn binpêkirina serweriyê û kiryarek êrişkar a neqanûnî ye ku bi tu hincetek olî an exlaqî nayê rewakirin.
Kongreaya Îslama Demokratîk û oldaran bang li oldaran, meclisên hiqûqî û saziyên Îslamî kir ku helwesteke olî ya zelal bigirin û van êrişan şermezar bikin, rijandina xwîna Sûriyeyiyan qedexe bikin û gurkirina nakokiyên etnîkî û mezhebî li gorî regezên Îslamê û nirxên wê yên jiyana hevbeş û edaletê sûcdar bikin.
Di dawiya daxuyaniyê de hat gotin ku parastina sivîlan, rawestandina êrişkariyê û parastina aştiya navxweyî erkên mirovî û exlaqî ne. Her wiha bang li civaka navneteweyî hat kirin ku tavilê tedbîran bigire da ku xwînrijandinê rawestîne û pêşî li berdewamiya dagirkerî û destwerdanên ku êşa Sûriyeyîyan kûrtir dikin û tevna wan a civakî xera dikin, bigirin.
Yekîtiya Zanayên Olî ya Herêma Kurdistanê derbarê êrişên çeteyên dewleta Tirk a dagirker yên li ser taxên Kurdan ên Şêx Meqsûd û Eşrefiyê yên li Helebê, daxuyaniyek belav kirin.
Yekîtiya Zanayan êrişên li ser herdu taxan bi tundî şermezar kir û hate gotin; “Êriş berovajiyê pîvanên ola pîroz ya îslamê ye, hêvîdarîn civaka navneteweyî beramberî êrişên ser Kurdan bêdeng nemîne. Em bang li sazî û kesayetên olî yên Kurd û Ereban dikin ku bi rola xwe rabin û ji bo rawestandina şer kar bikin. Em bang li hikumeta demkî ya Suriyeyê dikin ev şer û destdirêjiyê rawestîne. Divê danûstandin û aştiyê hilbijêre û mafên pêkhateyan berçavan bigire.”
