Şêniyên Wargeha Penaberan a Şehîd Rustem Cûdî (Mexmûr) li dijî êriş û komkujiyên çeteyên ser bi hikûmeta demkî ya Şamê û dewleta Tirk ên li ser taxên Şêxmeqsûd û Eşrefiye di 6’ê Çileyê de hatibû destpêkirin, meşekî girseyî hat lidarxistin.
Meş ji ber avahiya Komîteya Malbatên Şehîdan destpê kir heta ber avahiya Neteweyên Yekbûyî domand. Di meşê de al û posterên Rêber Apo, alên PJAK, KCK, QSD, wêneyên ku di êrişê de hatine qetilkirin, her wiha pankarên bi nivîsa ‘Rabe li mirovahiyê xwedî derbikeve bibe dengê Şêxmeqsûd û Eşrefiye, Cenga Rojava cenga Kurdisyanê ye, Bi berxwedana ciwanan emê dagirkeriyê têkbibin’ hatibûn bilindkirin. Bi wê ve girêdayî bi dirûşmeyên ‘Bijî berxwedana Şêxmeqsûd û Eşrefiye’, ‘Bijî berxwedana Rojava’ piştgiriya xwe ya bi gelên Rojava re dan nîşandan.
Piştî ku meş gihişt ber avahiya Neteweyên Yekbûyî li wê derê daxuyaniyek hat dayîn. Beriya ku daxuyanî were dayîn di kesayeta şehîdên Şêxmeqsûd û Eşrefiyê de ji bo tevahî cangoriyên Kurdistanê deqeyek rêz hat girtin. Piştî rêzgirtinê Heserokê Meclîsa Ciwanan a Mexmûrê Sîpan Yaman axivî.
Sîpan Yaman di destpêka axaftina xwe de qala komkujiyên li taxên Kurdan hatîn pêkanîn kir û wiha peyîvî: “Heta niha dewleta Tirk û dostên wî çeteyên ku di bin navê hikumeta vegûhêz de tê binavkirin carek din êrişî taxên me yên Şêxmeqsûd û Eşrefiye kirin. Wek tê zanîn ev her du tax ji 2014’an heta niha bi sekin û berxwedana xwe serê gelê Kurd bilind kiriye. Ji 6’ê Çileyê ve gelê me yên li Şêxmeqsûd û Eşrefiye li dijî tank, top û êrişên wan li ber xwe dide. Xelkên Şêxmeqsûd û Eşrefiye dan diyarkirin ku wê heta dilopa xwîna xwe ya dawî taxên xwe biparêzin û xwedî li gotinên xwe jî derketin. Em carek din mînaka şerê gelê şoreşgerî çiye li vêderê dibînin. Gelê Şêxmexsûd û Eşrefiye her tim ji bo şerê gelê şoreşgerî bûye mînakek berbiçav.”
Sîpan Yaman destnîşan kir ku ew carek din li vêderê girêdan bûna xwe ya bi Şêxmeqsûd û Eşrefiye re didin diyarkirin û wiha domand: “Mexmûr û Rojava yeke. Di vê pêvajoyê de li rûxmê ku hevpeyman hatibû çêkirin jî, kesên dibêjin em mafên mirovan diparêzin ker û lalin. Em vê bêdengiya wan rûreş û şermezar dikin, em dibêjin dem dema xwedîderketina li xaka Rojava û Kurdistanê ye. Çi dibe bila bibe emê hertim berxwedana Şêxmeqsûd û Eşrefiye ji xwe re esas bigirin. Em bang li hemû cîhanê dikin kesên ku dibêjin em şer naxwazin, di vê pêvajoya ku gelê Kurd aştî û civakek demokratîk dixwaze de divê pêwîstiyên gelê Kurd bên dayîn.”
Piştî daxuyaniyê meş bi dirûşmeyên ‘Bijî Berxwedana Rojava’ û ‘Ey şehîd xwîna te li erdê namîne’ bi dawî bû.
