Li dijî êrîşên berdewam ên li ser xelkê Rojava îro li navenda Şengalê bi sedan kes daketin qadan û bi dirûşma ‘Rojava Rûmeta me ye’ meşiyan.
Meşa xelkê Şengalê ku ji ber dibistana Zerîfa Osê ya navenda Şengalê destpê kir, heta dewreya Pîran dewam kir.
Di meşê de bê navber dirûşme ji bo berxwedana Rojava hatin berzkirin. Her wiha wêneyên tawanên ku li dijî jin, zarok û xelkê Rojava hatine kirin, hatin bilindkirin.
Piştî meş gihîşt ber dewreya Pîran li wir daxuyanî hate dayîn.
Daxuyanî ji aliyê endama TAJÊ Neam Eliyas ve hate dayîn. Di daxuyaniyê de banga xwedîderketina li berxwedana Rojava hate kirin û hate gotini ev êrîş xeteriyên mezin li ser civaka me ya Şengalê jî çêdikin.
Neam Eliyas di destpêkê de got: “Di serî de em hemû şehîdên ku di berxwedana Rojava de canê xwe dane bi bîr tînin û bejna xwe li ber bîranîna wan ditewînin. Wek tê zanîn, ev demeke li ser xelkê me yê Rojava êrîşên berfireh ji aliyê çeteyan ve tên kirin. Dixwazin çawa DAÎŞ’ê li dijî mirovahiyê tawan encam dan, ew jî heman kiryaran li ser xelkê me pêk bînin. Em wek xelkê Şengalê bi hemû hêza xwe û bi canê xwe li pişt Rojava ne; tu carî kes nikare me û Rojava ji hev qut bike. Em bang li hemû xelkê xwe dikin ku hişyar bin; yên ku niha li ser Rojava êrîş dikin, xwedî heman zihniyeta DAÎŞ’ê ne û kengî derfetê bibînin, ew ê êrîşî ser gelê me jî bikin.”
Eliyas hişiyarî da civaka Şengalê û got, “Divê xelkê me nekeve şaşitiyê da ku fermana 3’yê Tebaxê careke din li ser me dubare nebe. Divê xelkê me rêxistina xwe mezin bike û li hemberî hemû êrîşan li ber xwe bide.”
Piştî daxuyaniyê, meş bi dirûşmên “Bijî Berxwedana Rojava” û “Şehîd Namirin” bi dawî bû.
