Bajarê Kobanê yê Rojavayê Kurdistanê ji ber şer û dorpêça hefteyên dawî bûye navenda krîzeke mezin a mirovî. Ji ber êrişên dagirkeriyê yên çeteyên dewleta Tirk, HTŞ û DAÎŞ’ê ji Reqa, Tebqa, Eyn Îsa û herêmên derdorê bi deh hezaran sivîl ji cih û warê xwe bûn.
Malbatên koçber ku ji ber komkujiyên çeteyan derbasî Kobanê bûn, vê carê jî li hemberî sermayê, nebûna stargehan û kêmaniya pêwîstiyên bingehîn ên jiyanê li ber xwe didin.
Bi hezaran malbatên koçber li dibistan û mizgeftên li bajêr dimînin. Ji ber dorpêçê elektrîk, av, sotemenî û madeyên xurekê yên bingehîn bi temamî hatine qutkirin.
Serma û seqem di nava koçberan de bandora herî giran li jin û zarokan dike. Gelek malbat ku tiştekî li ser razên nîne, ji bo karibin xwe germ bikin textên li derdorê, bermahiyên plastîk dişewitînin.
Berfa zêde û serma li ser malbatên li avahiyên li dibistanan dimînin dibe sedema metirsiya jiyanî. Heta niha herî kêm pênc zarokan ji ber sermayê jiyana xwe ji dest dan. Nebûna xwarina pitikan, derman û kincên ji bo zivistanê rewşê hîn giran dike.
Dayikekê got, “Me her tiştên xwe li paş xwe hişt û em bi rê ket. Em gihîştin Kobanê. Tiştek nîne ku em li erdê raxin û li ser razên. 6-7 roj in em li vê derê ne. Cihekî me nîne ku em li ser razên.”
