Meclisa Sûriyeya Demokratîk (MSD) bi daxuyaniyekê ragihand ku çeteyên HDŞ’ê di demên dawîn de cîgirê hevserokên wê Xesan El Yûsif li Dêrazorê girtiye.
MSD’ê di daxuyaniyê de girtina Xesan El Yûsif bi tundî şermezar kir û diyar kir ku “girtina wî gaveke çewsîner e û binpêkirineke xeternak a bingehên xebata siyasî ye. Di heman demê de hewldana hedefgirtina kesayetên welatparêz e ku xebata aştiyane ji bo xizmeta civaka xwe û Sûriyeyê hilbijartiye.”
MSD’ê di dewama daxuyaniyê de diyar kir: “Girtina Xesan El Yûsif gaveke xeternak e ku nayê rewakirin an jî nayê paşguhkirin. Her wiha peyamên neyînî dide ku li dijî her axaftina li ser kêmkirina rageşiyê yan lêvebûna siyasî ne. Armancgirtina kesayetên siyasî yên ku destekê didin diyalogê û li çareseriyên nîştimanî digerin, nakeve xizmeta îstîqrarê û ne jî li gorî pêdiviyên qonaxa heyî ye.”
MSD’ê destnîşan kir: “El Yûsif yek ji wan kesayetan e ku di Rêveberiya Xweser de an jî li kêleka wê kar kirine ye û hîna jî beşek ji tevna nîştimanî ya Sûriyeyê ye. Her wiha ji wan kesan e ku destekê didin diyalog, çareseriyên aştiyane û entegrasyona nîştimanî. Vebijrêka wan ku di nav gelê xwe de bimînin û di rewşên zehmet de kar bikin, ne dijberî ye, lê belê îfadeya berpirsyariya nîştimanî û exlaqî ye, her wiha baweriya bi yekparbûna Sûriyeyê û girîngiya veguherîna ber bi demokrasiyê ve nîşan dide.”
MSD’ê daxuyand ku projeya Rêveberiya Xweser tu carî nebûye projeya parçebûnê û wiha domand: “Rêveberiya Xweser projeyeke sûriyeyî ye ku di çaçroveya hilweşîna dewletê de ava bûye. Rêveberiya Xweser hewl dide civak û aştiya navxweyî biparêze, rê li ber çareseriyeke siyasî ya giştî veke. Ev proje di hemû pêvajoyên xwe de pabendî yekparbûna Sûriyeyê bû û diyalog jî wekî rêya yekane ya çareserkirina nakokiyan esas girtiye.”
Di dewama daxuyaniyê de banga lezgîn a serbestberdana cîgirê hevserokê MSD’ê Xesan El Yûsif hat kirin û hate gotin berdewama ragirtina wê gaveke rageşî ye ku aliyên wî girtin ji bandorên wê berpirsyar e. MSD’ê careke din banga çareserkirina pirsgirêkan bi rêyên siyasî, diyalog û lihevkirina nîştimanî kir.
Di dawiya daxuyaniyê de hate gotin: “Helwesta me zelal e. Em bi xebata siyasî ya aştiyane ve girêdayî ne. Em hewl didin çarseriyeke nîştimanî ya giştî pêk bînin ku yekparbûna Sûriyeyê û serdestiya wê mîsoger bike û rê li ber pêvajoyeke nû vedike ku li ser esasê edalet, veguherîna demokratîk a dûrî mentiqê dûrxistin û cezayê be.”
