Di van rojên ku êrîşên li ser Bakur û Sûriyê didomin de, dorpêça li ser Kobanê hîn jî rakirî nîne. Piştî 11 salan, Kobanê ku ji aliyê DAÎŞ û çeteyan ve careke din hate hedefgirtin, berxwedana gel didome. Piştî ku di sala 2014’an de bi hezaran kesan jiyana xwe ji dest dan, bajêr hate rizgarkirin û bû mînakeke têkoşînê ji cîhanê re. Yên ku xizmên xwe winda kirine, dibêjin ku êrîşên nû dê negihîjin armanca xwe û çete dê wekî deh sal berê careke din bên têkbirin.
Rahime Çelik a ku li Kobanê di şer de kurê xwe Sertîp Çelîk (Serxwebûn Amed) winda kir, bi gotinên “Ew nikarin, ne hêviya me ne jî wan rojan ji holê rakin” bal kişand ser lîstikên li ser Kobanê û got ku ew ê têk bibin. Sertîp Çelîk ku xwendekarek zanîngehê bû, dema êrîşên li Kobanê di çapemeniyê de derketin, berê xwe da Pirsûsê. Ji ber komkujiyên ku diqewimin, got “Ez nikarim tenê temaşe bikim” û dibistana xwe hişt û çû Kobanê. Di rojên komkujiya Pirsûsê de li bajêr bû, piştî 2 mehan têkoşînê di şer de şehîd bû. Piştî windakirina jiyana xwe, cenazeyê wî ji aliyê malbatê ve hate standin û li Amedê hate veşartin. Dayik Rahîme Çelîk dibêje ku wê xebera rizgariya Kobanê li ser gorê ji kurê xwe re gotiye: “Min ji wî re got: Çavên te vekirî nemînin an jî li paş nemînin. Kobanê azad e, zarok niha azad in.”
‘JI MIRINAN RE BÊDENG NEMA Û ÇÛ’
Rahîme Çelîk dibêje ku hem kurê wê hem jî ciwanên din ji wê re moral dane û bi wê moralê gel wekî berê careke din li dora hev kom bûye û yekbûye. Got: “Piştî çend mehan kurê min telefonê me kir. Dema telefon kir bi ken bi me re peyivî, hal û hewalê me pirsî. Got rewşa wan xerab e. Du rojan piştî wê telefonê me xebera şehadetê stand. Digot moralê wan her tim bilind e. Digot tevî êrîşan jî berxwedan dikin. Wisa bû mîna ku bi wê telefonê xatir ji me dixwest. Piştî wê axaftinê em êdî negihîştin wî. Piştî ku min moralê wan ciwanan dît, hêviya min hîn zêdetir mezin bû.”
‘KOBANÊ DÊ CAREKE DIN WAN TÊK BIBE’
Rahîme Çelîk dibêje ku piştî deh salan ji wê berxwedan û serkeftinê ku bi yekîtî û têkoşînê hate bidestxistin, heman plan careke din têne xebitandin. Got: “Piştî rizgarkirina Kobanê em hemû şa bûn, digotin zarokên me mirin, êdî yên kesên din namirin, gelê Kurd êdî êş nakişîne. Niha jî piştî deh salan careke din êrîşî vî bajêr û gel dikin. Em dizanin ku wekî deh sal berê Kobanê careke din dê azad bibe. Hêvî û moralê me gelek bilind e. Li wir xwîna gelek ciwanan û çîrokên wan hene. Heta yek ciwanê me bimîne jî ez dizanim ku gel li wê bajarê dê baş berxwe bide. Em ê hêviya xwe bidomînin û biparêzin.”
‘EM Ê HÊVIYÊ BIPARÊZIN Û BIDOMÎNIN’
Rahîme Çelîk got ku ew ê ji bo axa ku zarokên wan canê xwe dane têkoşînê bidomînin û wiha dawî li gotinên xwe anî: “Bi Kobanê dixwazin hêvî û pêşeroja gelêkî ji holê rakin, lewma her tim êrîş dikin. Naxwazin gelê Kurd bibe xwedî statû. Destûrê nadin ku ev gel bi zimanê xwe yê dayikê û bi daxwazên xwe bijî. Wekî deh sal berê em ê bi heman yekîtî û moralê bajêr biparêzin û dengê xwe bigihînin cîhanê. Bi van êrîşan zarokên me li gorê jî aram nakin. Lê em û hevalên wan destûrê nedin. Ji bo ku yên çûyî bi aramî li van rojan binêrin em ê têkoşînê bidomînin. Di hefteyên dawî de şev û rojên me yek e, dilê me dişewite, lê dîsa jî em ê nebêjin ‘aman’.”
