Rapor li Şaxê Amedê yê OHD’ê bi civîneke çapemeniyê hate ragihandin. Gelek endamên OHD’ê beşdarî civînê bûn.
Hate ragihandin ku rapor li gorî çavdêriyên ji qadê, hevdîtina bi kesên hatin binçavkirin, parêzer û malbatên wan re, qeydên nexweşxane û edliyeyê û belgeyên dîtbarî hatiye amadekirin. Di raporê de hate destnîşankirin ku binpêkirin ji kêliya girtinê heta bi darizandinê bi rêk û pêk hatine kirin.
Li gorî raporê, di vê pêvajoyê de herî kêm 842 kes hatin binçavkirin û 118 kes jî hatin girtin ku 25 ji wan zarok in. Hate gotin, 106 kes jî li lêdan û kiryarên xerab rast hatin.
Ji Navenda Giştî ya OHD’ê Mehmet Oner got, “Divê dawî li qedexeya li ser mafê meş, xwepêşandan û civînên aştiyane bê anîn, binçavkirin û girtina kêfî tavilê bê bidawîkirin, têkildarî îdîayên li ser êşkence û kiryarên xerab lêpirsînên serbixwe û bi bandor bê meşandin û berpirsyarên binpêkirinen giran ên li hemberî zarokan hesab bidin. Weke OHD em ê belgekirina binpêkirina maf û cihgirtina li gel mexdûran û ragihandina heqîqetê ji bo raya giştî dewam bikin.”
