Berdevkên Hêzên Ewlekariya Hundirîn ên Rêveberiya Xweser û yên Wezareta Karên Hundirîn a hikumeta demkî ya Sûriyeyê diyar kir ku derbasbûna endamên hêzên ewlekariya hundirîn ên Wezareta Hundirîn li Qamişloyê bi awayekî baş û bê astengî, bi hemangenî û hevkariya Hêzên Ewlekairya Hundirîn (Asayîşê) pêk hat.
Di çarçoveya lihevkirina 30`ê Çileyê ya di navbera QSD`ê û hikumeta demkî ya Sûriyeyê de, şandeyeke endamên hêzên ewlekariya hundirîn ên Wezareta Karên Hundir a hikumeta demkî derbasî Qamişloyê bû. Her du aliyên têkildarî prosedurên îro pêk hatine axivîn.
Endama Fermandariya Giştî ya Hêzên Ewlekariya Hundirîn a Bakur û Rojhilatê Sûriyeyê Helîme Mehmûd Ebû Bekir pêşwazî li lihevkirinê kir, axivî: “Em vê lihevkirina ku di navbera QSDˊê û hikumeta Sûriyeyê de pêk hatiye pêşwazî dikin. Em bangawazên aştiyê, ne yên şer in. Em soz didin ku tevahî bendên lihevkirinê bi cih bînin” û bi diruşma “Jin, Jiyan, Azadî” dawî li gotina xwe anî.
Li aliyekî din jî ji fermandarên Hêzên Ewlekariya Hundirîn a Herêma Bakur û Rojhilatê Sûriyeyê Mehmûd Xelîl Elî (Siyabend Efrîn) axivî: “Agirbest pêk hat, benda duyemîn a lihevkirinê jî derbasbûna hêzan li Qamişlo û Hesekê bû, ev jî duh û îro pêk hat.”
Siyabend Efrîn destnîşan kir ku wê xebat li ser bendên din dewam bike, “Di serî de vegera hêzên leşkerî ji her du aliyan li nuqteyên xwe yên sereke. Heta niha tu astengî çênebûne. Em ê bi vê şêweyî dewam bikin.”
Berdevkê Wezareta Hundirîn a hikumeta demkî ya Sûriyeyê Nûredîn El Baba jî got: “Em îro bêyî astengiyan derbasî Qamişloyê bûn, tensîqeke mezin bi Asayîşê re hebû. Em spasiya wan li ser vê kedê û pêşwazîkirina baş dikin. Wê hêzên Wezareta Hundirîn li ser wergirtina avahiyên ewlehiyê ji Hêzên Ewlekariya Hundirîn (Asayîşê) bixebitin, li gorî lihevkirinê pê re xebata dîsplînkirina ewlehiyê bikin.”
El Baba destnîşan kir ku “Tiştê bûye hewayek erênî ji tevahî aliyan ve çêkir, hewcedariya gelê Sûriyeyê îro bi vê yekê heye. Gelê Sûriyeyê bi hemû pêkhateyên xwe bi ser ket. Îro rûpele nû ji bo avakirina Sûriyeyê dûrî tolhildan, xîtaba taîfî û kîndariyê vebû. Sûriye bi hemû şêniyên xwe tê avakirin. Wê Hesekê dilê ji bo tevahî welat lêdide bimîne.”
Di dawiyê de El Baba hêvî kir ku tevahî bendên lihevkirinê pêk bên.
