Cenazeyê şervanên QSD’ê Roman El Ehmed (Zuhêr Xanê) û Harûn Leylûn (Mahir Seydo) û endamê Hêzên Asayîşê Ehmed Mistefa yên di berxwedana li hemberî êrîşên komên hikûmeta demkî ya Sûriyeyê de şehîd bûne, bi merasîmekê li Pekrewangeha Şehîd Dijwar a li gundê Dawudiyê yê bajarê Hesekê hatin veşartin. Ji şervanên QSD’ê Egîd Hesekê (Raman Îsa) û Milîtan Rojava (Mihemed Xişo) ên di heman berxwedanê de şehîd bûne merasîma xiyabî hat lidar xistin.
Merasîm bi deqeyek rêzgirtin dest pê kir. Piştre endamê Meclîsa Giştî ya PYD’ê Ebdulxenî Oso axivî û got, bi saya keda şehîdan berxwedana vê dawiyê dîrokî bûye û hebûna gelê Kurd hat parastin.
Endama Fermandariya Giştî ya QSD’ê Dilbirîn Kobanê, jî axivî û got, “îradeya gel naşkê. Şoreş berdewam e. Ji bo vî gelî em amade ne bi dehan caran şehîd bibin.”
Dilbirîn Kobanê, anî ziman ku ew ê ji bo parastina destketiyên vê şoreşê rêya şehîd Ziyad Heleb bişopînin.
Piştî axaftinan nasnameyên 5 şehîdan hatin xwendin. Di dawiyê de cenazeyên şehîd Roman El Ehmed, Harûn Leylûn û endamê Hêzên Asyîşê Ehmed Mistefa bi dirûşmên “Şehîd namirin” spartin axê.
