Bi pêşengiya Platforma Ked û Demokrasiyê ya Semsûrê, bi boneya salvegera erdheja 6’ê Sibatê civîna gel hat lidarxistin. Hevseroka Giştî ya Partiya Wekhevî û Demokrasiyê ya Gelan (DEM Parti) Tulay Hatimogulları, Hevseroka Giştî ya Partiya Herêmên Demokratîk (DBP) Çigdem Kılıçgun Uçar, parlamenterên DEM Partiyê Ferit Şenyaşar, Ali Bozan, parlamenterên CHP’ê yên Mersînê Gülcan Kış, yê Kocaelyê Munip Kango û Şaredarê Semsûrê Abdurrahman Tutdere beşdarî civîna li Şaxa Semsûrê ya Komeleya Çandê ya Pîr Sultan Abdal bûn.
Hevseroka Giştî ya DEM Partiyê Tulay Hatimogulları di civînê de axivî û diyar kir ku di ser erdhejê re 3 sal derbas bûne û got: “Di ser erdhejê re tije 3 sal derbas bûn lê wekî ku em niha wê kêliyê ji nû ve dijîn e. Kes 6’ê Sibatê ji bîr nake. Taybetî em, em yên ku di bin wan kavilan de dengê mirovan bihîst, em yên ku xizmên xwe winda kirin, em ê vê êşê tu carî ji bîr nekin.”
‘ME JI BO KOLANDINA GORAN KEPÇE NEDÎT’
Tulay Hatimogulları anî ziman ku ji ber erdheja 6’ê Sibatê êşên mezin hatin jiyîn û wiha domand: “Me karesatek asayî ya xwezayî nejiya. 6’ê Sibatê bi temamî encama bêberpirsiyarî û îhmalkariyê ye. Tişta herî zêde dilê me dişewitîne ev e. Erdhej nakuje, avahî dikuje. Tevdîrên van nehatin girtin. Me ji kesên ku di bin wan kavilan de can didan û digotin ‘ma kes dengê min dibihîze?’ re tenê karibû bigota; ‘erê em dengê we dibihîzin lê ya ji destê me tê ev e.’ Ez ji roja yekem a erdhejê ve li Hatayê bûm. Ez bi xwe jî ji Samandaga Hatayê me. Wekî we min jî xizm û cîranên xwe winda kirin. Me tûrikê cenazeyan nedît. Me cîranên xwe yên li hemberî mala me, bi çarşefên ku me ji malê derxistin û betaniyên ku me rizgar kirin pêçan û me ew bi vî awayî veşartin. Me ji bo kolandina goran kepçe nedît. Destên ciwanên ku ji derve hatibûn birîndar bûn. Dema gor dikolandin me kepçe nedît.”
‘JI BO KARESATÊN NÛ ÇÊNEBIN EM Ê NEDIN JIBÎRKIRIN’
Tulay Hatimogulları got, “Desthilat û dewlet xwedî li me derneket. Lê em xwedî li hev derketin” û axaftina xwe wiha bi dawî kir: “Piştgiriya civakî moral da me. Piştgiriya civakî em anîn heta îro. Bila were zanîn ku canên hêja, me tu carî ev erdhej û windayên xwe ji bîr nekirin û em ê nedin jibîrkirin. Ji bo êşên nû neyên jiyîn em ê nedin jibîrkirin. Ji bo karesatên nû çênebin em ê nedin jibîrkirin.”
Bername bi kursiya azad bi dawî bû.
