Li Kobanê bi hezaran kes ji bo protestokirina komploya li dijî Rêber Apo daketin qadan. Kobanîyên ku ji ANF’ê re axivîn, teqez kirin ku çawa komploya yekemîn hatibe vala derxistin, ev hewildan jî dê bi heman rengî têk biçe. Gel anî ziman ku ew ê heta dawiyê xwedî li ramanên Rêber Apo derkevin û zarokên xwe bi vê hişmendiyê mezin bikin.
Dayika bi navê Wedhê Mislim Berces a ku beşdarî çalakiyê bû, diyar kir ku 27 sal in ew komployê protesto dikin û got: “Em kesên ku destê wan di vê komploya li dijî Rêberê me de heye şermezar dikin. Rêberê me komplo vala derxist û serkeftin bi dest xist. Yên ku ji ramanên wî ditirsiyan, têk çûn. Îro jî em ê vê komploya ku dixwaze me tune bike, bi ramanên Rêber Apo vala derxin.”
Wedhê Mislim Berces destnîşan kir ku ew ê zarokên xwe bi ramanên Rêber Apo mezin bikin û got ku jiyaneke azad bi vê xetê pêkan e. Berces wiha dewam kir: “Wekî gelê Kurd, îdeolojî û doza me yek e. Em ê li ser xeta Rêber Apo bimînin. Em ê zarokên xwe bi vê zanabûnê mezin bikin. Çi dikin bila bikin, komkujî be an jî zext be, em ê ji ramanên Rêberê xwe negerin û em ê bi ser bikevin.”
Sebrî Mehmûd jî diyar kir ku komplo nasnameya Kurd û vîna gelê Kurd hedef digire û got: “Bi piştgiriya bi dehan dewletan xwestin gelê Kurd û Rêber Apo tune bikin. Lê ne Rêber Apo û ne jî gelê wî nayên tunekirin. Doza Kurd û vê tevgerê dê hebûna xwe bidomîne. Serkeftin dê bi ramanên Rêber Apo were.”
Mehmûd di dawiyê de bi bîr xist ku komploya yekemîn bi ser neket û got: “Wê rojê komplo hat vala derxistin û me qezenc kir. Îro jî çi dibe bila bibe em amade ne. Em biryardar in ku Rêberê xwe azad bikin û heta dawiyê xwedî li ramanên wî derkevin. Çawa ku komploya yekemîn hatibe xelkirin, dê ev komplo jî were vala derxistin.”
