Çîgdem Kiliçgun Ûçar di civîna çapemeniyê ya bi şîara “Bi jina azad rê ber bi civaka demokratik ve” li Mûşê hatî lidarxistin de, axivî. Civîn di çarçoveya 8’ê Adarê Roja Jinan a Cîhanê de hate lidarxistin. Çîgdem Kiliçgun Ûçar bang li jinan kir ku di çarçoveya 8’ê Adarê de dakevin qadan.
Çîgdem Kiliçgun Ûçar diyar kir ku di êrîşên li ser Rojava de jin bi taybetî tên hedefgirtin û bi bîr xist ku keziya porê jineke hatî qetilkirin, hatibû jêkirin. Çîgdem Kiliçgun Ûçar anî ziman ku piştî vê bûyerê li gelek deverên cîhanê jinan porên xwe kirin kezî û piştevanî nîşan dan.
Di berdewamê de Çîgdem Kiliçgun Uçarê da zanîn ku îktîdarê sala 2025’an weke “Sala malbatê” ragihandibû û got ku di vê salê de 400 jin ji hêla mêran ve hatine qetilkirin. Her wiha got ku di nava 24 saetên dawî de 6 jin ji hêla mêran ve hatine qetilkirin û got: “Ev komkujî, encdama serdestiya mêr û dewleta mêr in.”
Bi domdarî Çîgdem Kiliçgun Ûçarê anî ziman ku di dîrokê de ji ewil heqîqeta jinan hatiye tarîkirin û wiha pê de çû: “Bi taybet jî li xaka Kurdistanê jin, bi polîtîkayên şerê taybet hedef tên girtin. Jinên ku mezintirîn pêşengên têkoşîna wekhevî û demokrasiyê ne, ji bo jiyaneke azad têdikoşin. Sembola vê ya herî mezin jî bû Rojava.”
Çîgdem Kiliçgun Ûçarê, bal kişand ser Banga Aştî û Civaka Demokratîk a Rêber Apo û axaftina xwe wiha qedand: “Di demeke em ber bi salvegera Banga Aştî û Civaka Demokratîk ve diçin de birêz Ocalan, di 8’ê Adara par de peyamek şand û got ‘Pirsgirêka jinê, ji pirsgirêka Kurd girantir e.’ Jinên ku bi felsefeya ‘Jin, jiyan, azadî’ pêşengtiya têkoşîna gerdûnî dikin, dê vê pêşengtiya xwe bidomînin. Di serî de jinên Kurd, dixwazim bang li hemû jinên ji bo azadî û wekheviyê têdikoşin dikim; têkoşîna me bandorê li tevahiya cîhanê dike û dibe pêşenga jiyana nû. Gava vê ya herî girîng û şênber jî Aştî û Civaka Demokratîk e. Em bang li hemû jinan dikin ku vê bidin jiyîn û mezin bikin.”
Daxuyanî, bi dirûşmên “Jin, jiyan, azadî” û “Bê Serok jiyan nabe” bi dawî bû.
