Piştî ku Komîsyona Meclîsê rapora xwe eşkere kir, nîqaş û bendewariyên li ser pêvajoyê jinûve zêde bûn. Peyama Rêber Apo ku li navenda pêvajoyê ye, têkildarî rapora komîsyonê hate parvekirin. Endama Heyeta Îmraliyê Pervîn Bûldan ji rojnameya Yenî Ozgur Polîtîkayê re detayên hevdîtina dawî ıya li Îmraliyê û gavên gengaz ên ji niha û pê ve nirxand.
‘BI MORAL E Û BALA XWE LI SER PÊVAJOYÊ YE’
Pervîn Bûldan diyar kir ku di hevdîtina dawî de Rêber Apo bi moral, xwedî tenduristiyeke baş û ji bo pêşvebirina pêvajoyê motîve bû. Bûldan diyar kir ku di hevdîtina sê saet û nîvan de Rêber Apo rojeva xwe bi rengê pêşnûmeyê bi heyetê re parve kir û weke her carê bi rengekî amadebûyî tevlî civînê bû.
PEYAMÊN TAYBET JI GIRTIYAN Û HIN KESAYETAN RE ŞAND
Pervîn Bûldan anî ziman ku Rêber Apo rewşa girtiyan pirsî û bi taybetî silav ji girtiyên jin ên li Girtîgeha Sîncanê re şand. Her wiha ji Îsmaîl Beşîkçî re peyameke taybet û ji malbata Selîm Sadak re jî peyama sersaxiyê şand.
DI MERCÊN ÎMRALIYÊ DE GUHERTIN NÎNE
Li gel bendewariyên raya giştî yên ji bo başkirina mercên muzakereyê yên Rêber Apo, Pervîn Bûldan diyar kir ku hîn guhertineke şênber nîne û got, “Zehmet e ku mirov bibêje başbûnek di mercan de heye. Ji xwe ji bilî me kes nikare biçe û hevdîtinê bike. Heyeta Îmraliyê mehê carekê hevdîtinê dike. Lİ gel vê yekê dem bi dem malbata wî, carna jî parêzer diçin. Lê belê divê ev zêde bibin, ku vê yekê hem ew dibêje, hem jî em dibêjin.”
‘ENTEGRASYONA DEMOKRATÎK’ WÊ ÇAWA PÊK WERE?
Li gorî gotinên Pervîn Bûldan, Rêber Apo pêvajoyê bi du qonaxan dinirxîne.
“Birêz Ocalan dema dibêje entegrasyona demokratîk qala yekbûneke klasîk nake. Têkildarî pêvajoyê ku bi rengê du qonaxan pênase dike, got; me qonaxa destpêkê qedand, temam kir. Yanî şer qediya, çek bi rengekî sembolîk jî be hate danîn. Birêz Ocalan diyar kir ku bi sererastkirina qanûnî re entegrasyoneke demokratîk divê bikeve meriyetê. Ev yek ne yekbûneke klasîk e. Dema qala entegrasyonê kir, destnîşan kir ku entegrasyon divê welê be ku mafên hev garantî dike. Di vir de bêguman mebest di serî de meseleya zimanê dayikê ya gelê Kurd, gelek mijar e. Anî ziman ku têkildarî van hemû mijaran pêwîstî bi garantiyê heye. Destnîşan kir ku divê nêzîkatiyeke welê bê nîşandan ku mafê gelê Kurd, hiqûqa gelê Kurd, nasname, ziman, çanda gelê Kurd diparêze. Entegrasyon tenê bi vî rengî dibe.”
Pervîn Bûldan diyar kir ku rapora Komîsyona Meclîsê ‘hêja ye” lê wan şerh danîn ser du beşan.
Pervîn Bûldan bal kişand ser tabloya piştevaniyê ya piştî êrişên li ser Rojava derkete holê û destnîşan kir ku vê yekê ruhê yekîtiya neteweyî xurt kiriye.
Pervîn Bûldan got, “Demeke dirêj e em bi nêzîkatiya Birêz Ocalan a li meseleya yekîtiya neteweyî zanin. Bi êrişên dawî yên li ser Rojava re careke din ruhê yekîtiya neteweyî hate afirandin. Li Ewropayê, li her devera cîhanê, li her cihê ku gelê Kurd lê ye ev nêzîkatî hate nîşandan. Bi taybetî yekîtiya li çar parçeyan dîrokî bû. Ruhê xwedîderketina li Rojava bû. Bi dîtina min di çareserkirina vê meseleyê ya li dora maseyê bi rêya muzakere û diyalogê berxwedana Kurdan bi bandor e. Birêz Ocalan di vê mijarê de xwedî hewldanên mezin e. Li Başûrê Kurdistanê nêzîkatiya Birêz Barzaniyan, Birêz Talabaniyan heye. Ev pir pir hêja ne. Em gelekî hêja dibînin, qîmeteke mezin dide wan hemûyan. Keda hemûyan, her kesî heye. Ev ruh hate afirandin û divê ev ruh êdî şênber bibe. Nêrîna Birêz Ocalan a li ser vê mijarê her tim zelal e. Yekîtiya Neteweyî êdî weke mijareke nebe nabe li pêşiya me ye. Ji niha û pê ve dibe ku bi rê û rêbazên cuda yên ragihandinê, bi muzakereyê û axaftinan divê ev yek bi cih bê anîn.”
