Piştî zextên dewleta Tirk a dagirker ên li ser Iraqê û gefên Wezîrê Tirk Hakan Fîdan ên dijî Êzidiyên Şengalê artêşa Iraqê tevî di gotin de dijî derket jî, îro li Şengalê dest bi çêkirina nuqteyên nû yên leşkerî kir.
Li gorî agahiyên ku çavkaniyeke ji hêzên ewlekariya Şengalê daye, îro êvarê artêşa Iraqê li seranserê Şengalê dest bi operasyona komkirina çekan kiriye.
Çavkaniyê diyar kir, artêş dixwaze dest deyne ser çekên welatiyên Êzidî ku ji bo xwe ji fermanê û gefên çeteyan biparêzin li gel xwe digirin.
Hate gotin, wê di nava van rojan de li hemû gund û komelgehên Şengalê operasyona dest danîna ser çekên Êzidiyan bimeşînin.
Çavkaniya taybet diyar kir, beriya fermanê jî hêzên fermî yên li Şengalê tevî xeteriyên DAÎŞ’ê jî dest danîbûn ser çekên Êzidiyan. Çavkaniyê da xuyakirin ku hewldana artêşa Iraqê ya niha senaryoya 2014’an bi bîr dixe.
