Meclîsa Malbatên Şehîdan a Dêrikê merasîma cenazeyên şervanên YPJ’ê Solîn Rojhilat (Kajîn Seîd Ezîz), Rûken Botan (Hava Ugurlu) ên ku 21’ê Çileya 2026’an li Reqayê şehîd bûne û şervanê QSD’ê Mîtan Welat (Hesen Hacî) yê ku 18’ê Çileyê li Dêrazorê şehîd bûye, lidar xist.
Bi sedan şêniyên bajarên Dêrik û Girkê Legê cenazeyên şehîdan ji Nexweşxaneya Şehîd Hogir a Dêrikê wergirtin û bi karwanekê ber bi Pakrewangeha Şehîd Xebat ve bi rê ket.
Karwanê cenazeyan dema gihaşt pakrewangehê ji aliyê sedan kesî ve bi dirûşmên dilsoziya bi şehîdan re hat pêşwazîkirin û merasîmek pêk hat.
Merasîm bi deqeyek rêzgirtin dest pê kir. Piştre ji rêveberên Meclîsa Malbatên Şehîdan Sabir Xidir axivî û got” Îro em 3 hevrêyên xwe oxir dikin ku bi destê xedir û xiyanetê şehîd bûne. Armanca şehîdên me parastina nirxên mirovî û civaka Sûriyeyê bû.”
Sabir Xidir, di dewama axaftina xwe de ji bo mîsogerkirina mafan di destûra nû ya Sûriyeyê de banga mezinkirina têkoşînê kir.
Ji fermandarên YPJ’ê Viyan Lezgîn jî axivî û got: “Em soza xwe bi şehîdan re nû dikin. Ev soz biryara me ya mezinkirina têkoşînê ye. Îro em xatirê xwe ji hevrêyên xwe re dixwazin ku canê xwe ji bo gel û welat dane. Ev xatirxwestin teqeziya li ser domandina berxwedana wan e. Hevrê Rûken ku ji Bakurê Kurdistanê bû, canê xwe li Rojava feda kir. Hevrêyên me timî li qadên şer bûn. Em ji gelê xwe re dibêjin ku xwedîderketina li şehîdan û şervanan moralê gelê me bilind dike. Ev moral jî bersiva têrker li hemberî hewldanên şer û qirkirina gelê me ye.”
Ji fermandarên QSD’ê Seîd Koçer, ku bavê şehîd Solîn Rojhilat e jî di merasîmê de axivî û ev tişt anî ser ziman “Êşa me giran e, lê îradeya me xurtir e. Em ê hêza xwe û têkoşîna xwe xurt bikin. Em soz didin gelê xwe û tevahî hevalên xwe ku em serî ji dijmin re natewînin û îradeya me lawaz nabe. Solîn keça yekane ya malbatê bû. Dema biryara tevlîbûnê da, me li pêşiya wê negirt. Lê me piştgiriya manewî da wê. Li Serêkaniyê birîndar bû, birîn ji xwe re nekir astengî û îsrara wê ya têkoşînê mezintir bû. Em soz didin Solînê û hemû hevrêyên wê ku em ê şopdarên xeta şehîdan bin ta armancên wan bi cih bînin.”
Piştî axaftinan wesîqeyên şehîdan hatin xwendin û radestî malbatên wan hatin kirin. Cenazeyên hersê şehîdan bi dirûşman spartin axê.
