Di festîvala ku dê di navbera 12-23’ê Gulana 2026’an de pêk were, navên pêşeng ên cîhana sînemayê dê ji bo Palmiya Zêrîn bikevin pêşbaziyê. Li gorî salnameya fermî ya festîvalê, çalakiya îsal dê di 12’ê Gulanê de dest pê bike û di 23’ê Gulanê de bi dawî bibe.
Di lîsteya ku hate eşkere kirin de; derhênerê Îranî Asghar Farhadi, sînemagerê Îspanyol Pedro Almodóvar, derhênerê Rûs ê li sirgûnê Andrey Zvyagintsev û her wiha navên ku berê li Cannesê xelat girtine Hirokazu Kore-eda û Cristian Mungiu wekî navên sereke derketin pêş.
Lîsteya pêşbaziyê ya îsal bi nûneriya kêm a sînemaya Amerîkayê balê dikişîne. Tê destnîşankirin ku di pêşbaziyê de tenê derhênerekî Amerîkî cih digire û studyoyên mezin ên Hollywoodê hema hema qet di festîvalê de xuya nakin, ku ev wekî yek ji sernavên girîng ên îsal tê dîtin.
Nûneriya derhênerên jin a di lîsteyê de jî bû sedema nîqaşan. Di pêşbaziya sereke de tenê pênc derhênerên jin cih girtin û ev hejmar li gorî par kêm bû. Li hemberî vê yekê, sînemagerên Fransî yên nifşê nû jî di nav lîsteyê de cihê xwe girtin. Derhêner Léa Mysius, bi fîlmê “Histoires de la nuit” ku ji romana Laurent Mauvignier hatiye girtin, dê cara yekem kelecana pêşbaziyê bijî.
Navekî din ê balê dikişîne yê sînemaya Fransî Arthur Harari ye. Fîlmê nû yê Harari “L’Inconnue”, ji hêla rêveberiya festîvalê ve wekî yek ji berhemên herî bi nîqaş ên lîsteyê hate nîşandan. Harari, berê bi Justine Triet re senaryoya fîlmê “Anatomie d’une chute” nivîsandibû ku di sala 2023’an de xelata Palmiya Zêrîn girtibû.
Di bernameya îsal a festîvalê de sînemaya Îspanyayê jî xwedî cihekî bi hêz e. Cihgirtina sê fîlmên Îspanyol di lîsteyê de, ji hêla rêveberiya Cannesê ve wekî nîşaneya tevgera di hilberîna sînemaya wî welatî de hate nirxandin.
Ji derveyî pêşbaziya sereke û di beşên dervayî pêşbaziyê de fîlmên ku ji bûyerên rastîn hatine girtin derdikevin pêş. Bi taybetî fîlmê “L’abandon” ku li ser rojên dawî yên mamoste Samuel Paty ye û fîlmê “L’Affaire Marie-Claire” ku doza Bobigny dike navenda xwe, wekî wan berheman têne nîşandan ku tê payîn herî zêde werin axaftin.
