Şaxa Komeleya Mafên Mirovan (ÎHD) a Agiriyê, têkildarî girtinên bi hinceta pîrozbahiyên Newrozê yên bajar daxuyanî da. Daxuyanî, li ser Cadeya Cumhuriyetê hate dayin. Gelek kes tev li daxuyaniyê bûn. Metna daxuyaniyê ji hêla Hevserokê Şaxa ÎHD’a Agiriyê Azad Akbulut ve hate xwendin.
Akbulut, diyar kir ku îktîdara siyasî ji tijebûna qadên Newrozê aciz bûye û ketiye nava tevgerê. Akbulut, got: “Di 24’ê Nîsanê de li Agiriyê pîrozbahiya Newrozê hat lidarxistin û di 7’ê Nîsanê de jî bi ser malan de hate girtin. Gelek welatî, ji ber tevlibûna pîrozbahiyê hatin binçavkirin. Agahiyên me ji parêzerên pêvajoya lêpirsînê şopandin wergirtine nîşan didin ku di dema binçavkirinê de welatî li pêş çavên malbat û zarokên wan biçûk hatine xistin, mafên wan ên sereke û azadiya wan hatiye binpêkirin û rastî miameleya xerab hatine.”
Di berdewamiya axaftina xwe de Akbulut destnîşan kir ku di dema binçavkirinê de polîsan hewl dane welatiyan biçûk bixin û wiha domand: “Di dema girtina îfadeyan de hukmên Qanûna Muhakemeya Cezayê tune hatin hesibandin, welatî dane zorê ku der heqê hevdû de îfadeyan bidin, pirsên tawanbar û araste dikin jê hatin kirin. Sepanên derhiqûqî tenê bi vê bisînor neman, her wiha xebatên pîşeyî yên parêzeran tune hatin hesibandin û nehiştin mafê parastinê bi awayekî bandor bê bikaranîn. Piştre jî Serdozgeriya Komarê ya Agiriyê îfadeyên welatiyan girt. Welatiyek tenê ji ber ku keniyaye bi daxwaza girtinê hatiye sewqkirin. Welatiyekî din jî ji ber ku navê wî Mehkûm e bi gotina ‘gelo dixwazî heqê navê xwe bidî’ rû bi rû maye. Welatî ji ber kenê xwe, ji ber nav û nasnameya xwe ya etnîkî hatine daizandin. Bi vî awayî komî bi daxwaza girtinê hatine sewqkirin.”
Herî dawî jî Akbulut got ku ew vê nêzikatiyê, bêhiqûqtî û derqanûntiyê qebûl nakin û dê çiraya azadî, demokrasî û aştiyê ya rewa û mafdar bilind bikin.
Piştî daxuyaniyê, girse bi dirûşman heta pêşiya avahiya ÎHD’ê meş li dar xist.
