Berdevkê Meclîsa Jinan a DEM Partiyê Halîde Turkoglû beriya civîna Meclîsên Jinan a Enetoliya Hundir daxuyanî da û bal kişand ser armanca mezinkirina têkoşîna rêxistinkirî ya jinan.
Halîde Turkoglû diyar kir ku ew ê di tevahiya meha Gulanê de li herêmên cuda bi meclîsên jinan re bicivin û got, “Em ê bi berpirsyariya Banga Aştî û Civaka Demokratîk rêxistinbûna xwe mezin bikin.”
Halîde Turkoglû bal kişand ser cînayetên jinan û têkoşîna li dijî tundiyê û anî ziman ku ev pêvajo di heman demê de têkoşîna edalet û azadiyê ye. Halîde Turkoglû qala dosyayên Gulistan Doku û Rojwelat Kizmaz jî kir û destnîşan kir ku ji bo ronîkirina van bûyeran ew ê têkoşînê bidomînin. Halîde Turkoglû dewlet rexne kir ku li gorî berpirsyariya xwe tevnagere.
Halîde Turkoglû got, “Divê aqûbeta Gulistan û Rojwelat bi hemû aliyên xwe ve derkeve holê, ev yek deynê dewletê yê li hemberî jinan e. Em ê her tim pirs bikin, Gulistan li kuderê ye, çi bi serê Rojwelat hat?”
Di daxuyaniyê de her wiha bang hate kirin ku Peymana Stenbolê car din vegere. Halîde Turkoglû diyar kir ku ev yek ji bo parastina mafê jiyanê yê jinan, krîtîk e.
Halîde Turkoglû bal kişand ser tundiya ku di jiyana perwerde û civakî de jî zêde bûye û anî ziman ku çareserî bi nêzîkatiyên li ser esasê wekhevî û zayendiya civakî pêkan e.
Halîde Turkoglû ev tişt jî got, “Em bi israr dibêjin aştî. Li vî welatî rêya aştiyê, tenê aştiya bi Kurdan re nîne. Aştiya bi karkeran, kedkaran, ciwanan û jinan e.”
Halîde Turkoglû ji bo 1’ê Gulanê jî bang kir û got, jin wê bi daxwaza ked, wekhevî û azadiyê li qadan bin. Her wiha ji bo Meşa Rûmetê ya Astengdaran jî ku wê 3’ê Gulanê li Amedê were lidarxistin, banga tevlîbûnê hate kirin.
