Di sala 1977an de polîsan êrişî koma ku hewl da li Qada Taksîmê 1’ê Gulanê pîroz bike, kiribû. Di encama êrişê de 41 kes jiayana xwe ji dest dabûn. Di sala 1989an de li Şîşhaneyê polîs êrişî xwendekaran kiribû û ciwanê 17 salî bi navê Mehmet Akîf Dalci hatibû kuştin, di sala 1996an de jî li Kadikoyê polîs êrişî gel kiribû û 3 karker hatibûn kuştin.
Konfederasyona Sendîkayên Kedkarên Cemaweriyê (KESK), Konfederasyona Sendîkayên Karkerên Şoreşger (DÎSK), Yekîtiya Bijîşkên Tirk (TTB) û Yekîtiya Odeyên Endezyar û Avahîsazan a Tirk (TMMOB) ji bo kesên di pîrozbahiyên 1’ê Gulanê de jiyana xwe dest dabûn li Evrazê Kazanciyê, Şîşhane û Kadikoyê bernamayên bîranînê li dar xist.
Endam û rêveberên sendîkayan, nûnerên partiyên siyasî ewilî li Evrazê Kazanciyê kom bûn, qurbanî bi bîr anîn û li vir daxuyanî hate dayîn. Ewilî Seroka Giştî ya DÎSKê Arzû Çerkezoglu axivî.
Arzû Çerkezoglu diyar kir ku Qada Taksîmê qada 1’ê Gulanê ye û got: “Kesên ku xwestin dengê karkera qut bikin îro hê li ser kar in. Ev desthilat li dijî kedê aliyê kedxwariyê ye. Her ku diçe êrişên xwe zêde dike. Ev dorpêça li Qada Taksîmê hişmendiya AKPê nîşan dide. AKP îro dixwaze bi destê emperyalistan desthilatdariyê di destê xwe de bigire. Lê xwediyên vî welatî hene. Em li vir in, dirûşmeya me jî ‘Bibin yek û biguherînin’ e. Em werin cem hev tu kes nikare li pêşiya me bisekinê.”
Paşê Hevserokê Giştî yê KESK’ê Ahmet Karagoz axivî û destnîşan kir ku di sala 1977’an êrişî li gel hate kirin lê divê were zanîn ku kes nikare têkoşîna karkeran ji holê rake û wiha axivî: “Kiryar hatin parastin. Li dijî wan hewceyî bi berxwedanek hê mezintir heye. Em ê têkoşîna xwe mezin bikin.”
Piştî bernameya li vir girse ji Evrazê Kazanciyê heta Şîşhaneyê meşiya û li vir ji bo Mehmet Akîf Dalci yê ku sala 1989’an di çalakiya 1’ê Gulanê de hatibû kuştin, bibîr anîn.
Seroka 2’yemîn a Konseya Navendî a TTB Pinar Saîp li vir axivî û ev yek anî ziman: “Mehmet Akîf Dalci bi fîşeka polîsan hate kuştin. Mehmet Akîf 17 salî û karkerekî zorak bû. Îro zarok li kar jiyana xwe ji dest dedin. Em ji bo zarok û karker bi awayekî ewle bixebitin têdikoşîn. Em ê li qadên 1ê Gulanê bibêjin ‘em ê biguherînin’.”
Paşê girse qerenfîlan danîn cihê ku Dalci lê hatibû kuştin û ji vir derbasî Kadikoyê bû û li wir ji bo 3 karkeran ku di sala 1996’an de hatibûn kuştin, bernameya bîranînê li dar xist.
