Rêveberên Rêxistina Tenduristiyê ya Cîhanê (WHO), Komîteya Xaça Sor a Navneteweyî (ICRC) û Bijîşkên Sînornenas (MSF), bi daxuyaniyek hevpar ku roja Yekşemê weşandin, neparastina xizmetên tenduristiyê yên li herêmên şer bi tundî rexne kirin.
Her sê rêxistinan, ragihand ku tevî nerazîbûn û biryara 2286 a Konseya Ewlekariyê ya Neteweyên Yekbûyî ku 10 sal berê bi piraniya dengan hatiye erê kirin jî, êrîşên li ser birîndar, xebatkarên tenduristiyê û nexweşxaneyan zêdetir bûne û rewş girantir bûye.
Di daxuyaniyê de hat gotin, “Rewşa îro ji ya 10 sal berê xirabtir bûye. Em li vir ne ser ketin, bin ketinê dibînin” û hat destnîşan kirin ku çavkaniya pirsgirêkê ne ji hiqûqê, ji lewazbûna îradeya siyasî digire.
BANGA ÇALAKIYA LEZGÎN HAT KIRIN
Hat diyar kirin ku êrîşên li ser navendên tenduristiyê, veguhastin û xebatkarên tenduristiyê bênavber berdewam dikin. Her sê rêxistinan, bang li civaka navneteweyî kirin ku tedbîrên lezgîn bigirin.
Di daxuyaniya hevpar de, hat destnîşankirin ku hedefgirtina nexweşxane û xebatkarên tenduristiyê ne tenê krîzek mirovî ye, di heman demê de krîzek mirovayetî ye jî.
Rêxistinan daxwaz kirin ku serokên cîhanê tedbîrên xurttir bigirin da ku xizmetên tenduristiyê biparêzin û mekanîzmayên parastinê yên xurtir peyda bikin. Her wiha ji bo êrîşan daxwaza lêpirsînên demildest, zelal û bêalî hatin kirin.
JI SEDÎ 85 AKTORÊN DEWLETÊ BERPIRSYAR IN
Di heman demê de Şêwirmendê Parastina Tenduristiyê Michael Keeffe, jî di daxuyaniya xwe ya vê heftê de diyar kir ku ji sedî 85 aktorên dewletê ji bûyerên ku bandor li xizmetên tenduristiyê dikin berpirsyar in.
