Emmanuel Macron şeva Yekşemê li Êrîwanê daxuyaniyek da û got ku ew ê bi Îlham Aliyev re hevdîtinê bike û rewşa dîlgirtiyên Ermenî yên li Azerbeycanê tên ragirtin bîne rojevê.
Serokkomarê Fransayê Emmanuel Macron diyar kir ku ew ê piştî Cîvina Koma Siyasî ya Ewropayê (AST) bi Aliyev re hevdîtinê bike û got ku Fransa rola xwe ya navbeynkariya di navbera Baku û Êrîwanê de didomîne. Rojnamegerekî Ermenî pirsa ‘’Civaka navneteweyî wê ji bo serbestberdana dîlgirtiyan çi bike?’’ li Macron kir û Macron jî li hemberî pirsa berbehs bersiva ‘’Muzakere!’’ da.
Serokê Fransiz diyar kir ku ew ê bi Serokwezîrê Ermenistanê Nikol Paşinyan re jî hevdîtinekê bike û got: ‘’Piştî vê hevdîtinê ez ê bi Serok Aliyev re jî hevdîtinekê bikim.’’
Tê payîn ku di çarçoveya seredana Macron a ji bo Êrîwanê de piştî tevlîbûna civîna AST’ê wê seredaneke fermî ya ku heya şeva Sêşemê berdewam bike, pêk bîne.
Civîna AST ya ku piraniya welatên Ewropayê tîne ba hev û salê du caran tê lidarxistin, serokên welatên endamên Yekîtiya Ewropayê (YE) yan jî serokên welatên ne endam tîne ba hev; lê belê Rûsya û Belarûs di vê platformê de cih nagirin.
Macron di daxuyaniya xwe de diyar kir ku rageşiya di navbera Ermensitanû Azerbeycanê de kêm bûye û ew ketine serdemeke nû û ev yek anîn ziman: ‘’Ji bo xurtkirina aşitî û aramiyê piştgirîdayîna vê pêvajoyê gelekî girîng e. Rola me ew e ku em rewşê baş bikin û ya ji destê me tê, em bikin.’’
Ermenistan û Azerbeycanê di Tebaxa 2025’an de li Washingtonê di bin kontrola Donald Trump de lihevkirineke têkildarî bidawîkirina nelihevkirina ser xakê ya bi deh salan e berdewam dike, îmze kiribûn.
Herêma Qerebaxê ku li navenda şer û pevçûnên di navbera aliyan de ye, piştî belavbûna Yekîtiya Sovyetan û li gel şerên di sala 2020’an de ketibû rojevê. Azerbeycanê di sala 2023’yan de li herêma berbehs operasyoneke leşkerî ya demkurt pêk anî û kontrola herêmê dubare bi dest xistibû.
