Hate ragihandin ku Serokê Giştî yê BİRTEK-SEN’ê Mehmet Turkmen, piştî nameya xwe ya ku tê de behsa şert û mercên giran ên Girtîgeha Tîpa E ya Dîlokê û rewşa girtiyên nexweş kiribû, ji aliyê sergardiyanan ve bi zivirandina milê wî hatiye birin û xistin şaneyê. Têkildarî mijarê daxuyaniyek hate weşandin û diyar kir ku Turkmen danê sibê dema xwestiye rewşa girtiyekî nexweş ji gardiyanan re ragihîne, ji aliyê gardiyanan ve ji qawîşê hatiye derxistin û xistine şaneyê.
BİRTEK-SEN’ê di berdewamiya daxuyaniya xwe de cih da van agahiyan: Li qawîşên 20-25 kesî de zêdetirî 60 kesî bi zorê didin mayîn, gihîştina hîjyenê hema bêje ne gengaz e. Ev mercên ku mirovên saxlem jî tê de nexweş dikevin û nexweş jî baş nabin, bi serê xwe li dijî rûmeta mirovahiyê ne. Di ser de jî, tenê ji ber ku Mehmet Turkmen xwest girtiyekî nexweş bigihîje dermankirinê, milên wî li paş hatin zivirandin û xistin şaneyê; ev yek nayê qebûlkirin. Em ê li dijî hemû berpirsên ku muameleya kêfî dikin, rûmeta mirovahiyê binpê dikin û muameleya wek îşkenceyê li serokê me yê giştî dikin, serlêdana sûc bikin. Hûn ê hesab bidin.
