Rêxistinên bajarê Wanê yên Partiya Demokrasî û Wekheviyê ya Gelan (DEM Partî) û Partiya Herêman a Demokratîk bi gel re cejn pîroz kirin. Pîrozbahiya li Rêxistina Bajêr a DEM Partiyê pêk hat, bi beşdariya endama Heyeta Îmraliyê ya DEM Partiyê û Serokwekîla Meclîsê Pervîn Bûldan û gelek endamên partiyê û rêxistinên civakî yên demokratîk hate lidarxistin.
Pervîn Bûldan li qadê axivî, cejn pîroz kir û li ser hevdîtina 24’ê Gulanê ya bi Rêber Apo re pêk anîn, agahî da. Pervîn Bûldan ragihand ku piştî 2 mehan ew çûn Îmraliyê, bi Rêber Apo re hevdîtinek ji 3 saetan pêk anîn û got, Rêber Apo di hevdîtinê de li ser şêweyê çarçoveya qanûna divê bê amadekirin nirxandinên berfireh kir.
QANÛNEKE ÇARÇOVEYÊ YA JI 7-8 XALAN
Pervîn Bûldan got, “Beriya her tiştî vê bibêjim; rewşa tenduristiyê û moralê Birêz Ocalan baş e, baweriya xwe ya bi pêvajoyê di cih de ye û ji bo pêşveçûna pêvajoyê jî di nava karekî berfireh de ye.”
Pervîn Bûldan axaftina xwe bi vî rengî dewam kir: “Hevdîtina ku me kir bi giranî li ser qanûna bê derxistin bû. Şêwewyê çarçoveya qanûnê bi berfirehî nirxand. Anî ziman ku divê qanûn qanûneke esasî be, piştî ku ev qanûn derket wê çerxa demokrasiyê karibe bi lez bigere. Lê belê diyar kir ku ji bo vê qanûna bê derxistin, girîng e ku li ser qanûna ku weke pêşnûme bê amadekirin lihevkirinek hebe. Qanûna ji 7 heta 8 xalan wê qanûneke çarçoveyê be û ji bo carekê be. Endamên rêxistinê wê di nav demeke diyarkirî de karibin ji vê qanûnê sûdê werbigirin û karibin bên Tirkiyeyê yan jî biçin cihekî din ku bixwazin.
‘EM PLAN DIKIN KU PÊŞNÛMEYÊ PÊŞKÊŞÎ BIRÊZ OCALAN BIKIN’
Di hevdîtinên me yên piştî cejnê de hewldanên me hemû wê ji bo derxistina vê pêşnûmeyê bin. Em ê bi lez di nava meh û nîvekê de yanî beriya meclîs bê girtin, ji bo ev qanûn bê derxistin hevdîtinan bikin, danûstandinên xwe dewam bikin. Ji ber ku ev pêvajo gelekî acîl e ku nabe ji demê re bê hiştin û divê qanûn jî tavilê bê derxistin. Her ku dem derbas dibe rîsk jî mezin dibin. Lewma weke ku Birêz Ocalan jî anî ziman, bêyî ku ji demê re bihêlin, em ê danûstandinên xwe zêde bikin û ji bo derxistina vê pêşnûme û qanûnê hewldanên xwe temam bikin û vê pêşnûmeyê bi lez pêşkêşî Birêz Ocalan bikin.
PAKETÊN DEMOKRATÎKBÛNÊ YÊN PIŞTÎ PÊŞNÛMEYÊ
Piştî pêşnûmeyê wê paketên reform û paketên demokratîkbûnê derkevin. Tirkiye wê bikeve nava pêvajoya demokratîk ku mafê wê ye. Em zanin ku bala hevalên me yên li girtîgehan, bala gelê me li vê qanûnê ye. Heta ku ji destê me bê, ji bo karibin bi lez derxînin em ê karê xwe dewam bikin. Em zanin ku bûyerên li Rojhilata Navîn, konjonktur dikare her tiştî bi xwe re bîne. Bûyerên ku îro li Rojhilata Navîn diqewimin, bûyerên li ser gelê Kurd û li ser CHP’ê diqewimin bêguman ne yên qebûlkirinê ne. Di nava vê konjonkturê de hêvî û bendewariya me hemûyan ew e ku pêvajoya aştî û demokrasiyê bi pêş ve biçe û bibe xwedî zemîneke qanûnî.”
