Di ser destpêkirina Pêvajoya Aştî û Civaka Demokratîk re sal û nîvek derbas bû. Di vê pêvajoyê de Tevgera Azadiyê gelek gav avêtin, lê bellê dewletê heta niha gaveke ku baweriya gel a bi pêvajoyê xurt bike neavêtiye.
Hîn jî ji aliyê bicihanîna sererastkirinên qanûnî yên pêwîst ve bêdil tevdigere. Desthilatdarî ku statuya siyasî ya Rêber Apo nas nake, li gel ranekirina bi temamî ya tecrîdê, di mijara berdana girtiyên bi nexweşiya giran û girtiyên ku cezayê wan temam bûye gavê neavêje.
‘YÊN KU TÊNE BERDAN EW HEVAL IN KU CEZAYÊ WAN QEDIYA YE’
Hevseroka Komeleya Alîkariya bi Malbatên Girtî û Hikumxwaran re ya Marmarayê (MATUHAY-DER) Nûrten Karagoz li ser vê helwesta li hemberî girtiyan ji ajansa me re axivî û destnîşan kir ku nêzîkatiya navborî dike ku malbat li pêvajoyê bipirse.
Nûrten Karagoz diyar kir ku gel li bendê ye ku berdana girtiyan bibe gava destpêkê ya ji bo pêvajoyê, lê belê dewlet xwe nade ber avêtina gaveke bi vî rengî û got, “Ji destpêkirina pêvajoya Aştî û Civaka Demokratîk û vir ve ku Rêberê Gelê Kurd Birêz Abdullah Ocalan di 27’ê Sibatê de da destpêkirin, gava destpêkê û ya tê hêvîkirin li qada girtîgehan e. Lê belê heta niha girtî nehatine berdan. Hevalên ku têne berdan ew heval in ku ji cezayê li wan hatiye birîn bêhtir di girtîgehê de man e. Berdana wan bi pêvajoyê ve girêdayî nîne, ew berdan e ku diviyabû ji xwe bihata kirin.
Bernedana girtiyan ji destpêkê ve bêhiqûqî ye. Li Girtîgehan Desteyên Çavdêrî û Îdareyê hene; desteyek e ku ti bingeheke xwe ya hiqûqî nîne û bi rengekî kêfî hatiye avakirin. Biryarên ku ji aliyê van desteyan ve têne dayin jî biryarên kêfî ne. Bi rengekî kêfî girtî nayên berdan. Ji mirovên ku 30 salan girtî maye re pirsa ‘Tu poşman e?’ tê pirsîn. Bi gotina ‘Nikare bikeve nava ahengiya civakê’ heqaretê li wan dikin.”
‘MALBAT LI SAMÎMIYETA PÊVAJOYÊ DIPIRSIN’
Nûrten Karagoz ragihand ku binpêkirina mafên mirovan bandoreke neyînî li malbatan dike û axaftina xwe bi vî rengî dewam kir, “Ev binpêkirin bêguman li nava malbatan dibe sedema aciziyeke cidî ya psîkolojîk. Mirov li benda berdana zarokên xwe ne, lê li tiştekî cuda rast tên. Malbat li bendê ne ku di serî de girtiyên nexweş hemû girtî bêne berdan. Her ku pêvajo dirêj dibe li samîmiyeta wê dipirsin. Ji bo hevalên girtî hîn giran dibe.”
‘BAWERIYA MALBATAN Û GIRTIYAN A BI BIRÊZ OCALAN TAM E’
Nûrten Karagoz destnîşan kir ku baweriya malbatan û girtiyan a bi Rêber Apo re tam e, lê belê li neavêtina gavên dewletê dipirsin û herî dawî got, “Malbat bi taybetî xwedî bendewariyekê ne. Rêxistinên xwe fesix kir, li benda avêtina gavekê ne. Girtiyên li girtîgehan dixwazin bêne berdan û tevlî pêvajoyê bibin. Li gel hebûna gumanan jî baweriya bi Birêz Ocalan heye. Di her firsendê de vê tînin ziman.
Tişta ku em ji destpêkê ve dibêjin ev e. Beriya ku meclîs bikeve betlaneyê, hin tişt têne gotin ku wê sererastkirinên qanûnî bêne kirin. Hêvîdar im ku sererastkirinên qanûnî wê tavilê bêne kirin ku kêm jî be bêhn bê ber civakê û hîn bêhtir ji pêvajoyê bawer bikin. Bendewariya hem malbatan hem jî hevalên li girtîgehan ew e ku sererastkirinên qanûnî tavilê derkevin.”
