Navenda Mafên Mirovan a Îranê li ser zêdebûna zextên hêzên rêjîma Îranê û dezgehên dadweriyê yên li ser xelkê Rojhilatê Kurdistan û Îranê raporek belav kir.
Di raporê de hate diyarkirin ku parêzera bi navê Gulale Wetendost ku ji bajarê Merîwanê yê Rojhilatê Kurdistanê ye, piştî ku wekaleta dosyeya girtiyên Şoreşa ‘Jin, Jiyan, Azadî’ girtibû ser xwe, ji aliyê Dadgeha Şoreşê ya Sineyê ve bi tohmeta ‘propagandaya li dijî dewletê’ cezayê 6 sal, 7 meh û 20 roj ê girtîgehê lê hatibû birîn. Gulale Wetendost ji bo bicihanîna cezayê lê hatî birîn, veguhestin Girtîgeha Navendî ya Sineyê.
Hate diyarkirin ku 7 xwendekarên Zanîngeha Hunerî ya Şerîf a Tehranê ku di nav wan de du jinên bi navên Perniyan Xudabexşî û Fatime Xakpûr jî hene, ji ber çalakiyên wan ên di tevnên medyaya dijîtal de yên girêdayî xwepêşandanên seranser ên vê dawiyê li welat qewimîn, ji aliyê zanîngehê ve cezayê dûrxistinê li wan hat birîn.
Di heman raporê de hate destnîşankirin ku rewşa tenduristiyê ya girtiya siyasî ya 62 salî Fatime Sipêhrî ya di Girtîgeha Vekîlabad a Meşhedê de tê girtin, dibin metirsiyeke giran de ye.
Fatime Sipêhrî, weke bertek li dijî binpêkirina mafan û bêrêziya berpirsên girtîgehê ya li hemberî rûmeta mirovî, dest bi greva birçîbûnê û redkirina dermanan kiriye. Hevsozên Fatimeyê hişyarî dan ku ger heta roja şemiyê (îro) bersiva daxwazên wê yên yasayî neyê dan, ew ê li deverên cuda yên Îranê dest bi çalakiyên protestoyî bikin.
Navenda Mafên Mirovan a Îranê da zanîn ku Mehdiye Yûsifî ya 19 salî ku yek ji girtiyên xwepêşandanên dawiyê ye, bi nexweşiyeke giran a dil re têdikoşe û berdewamiya girtina wê di girtîgehê de, fikarên mezin li ser rewşa wê ya tenduristiyê çêdike.
