Civîna yekemîn a Parlamentoya Sûriyeyê (Meclisa Gel) ku hefteya borî hatibû taloqkirin, li Şamê hat lidarxistin.
Destpêkê endamên parlamentoyê bi komî sond xwarin. Piştre dê serokê parlamentoyê û endamên nivîsgehên wê werin diyarkirin. Endamên dê werin diyarkirin dê civînê bi rêve birin û li gore yasayên danezana destûrê û pergala demkî ya hilbijartinê xebatên dema bê destnîşan bikin.
Piştî temamkirina hilbijartina desteya nivîsgehê, dê mekanîzmeya rêxistinkirina kar, avakirina komîsyonên wê, xebatên dema pêş werin nîqaşkirin.
Biryar bû civîna yekemîn 6‘ê Tîrmehê hatiba lidarxistin, lê Komîsyona Bilind a Hilbijartinan bêyî ku sedemê diyar bike civîn taloq kiribû.
Li gorî pergala demkî ya hilbijartinan, Parlamentoya Sûriyeyê ji 210 endaman pêk tê. Ji wan 140 endam ji aliyê komîsyonên hilbijartinan ên parêzgehan hatin tayînkirin. Serokê Hikumeta Demkî Ehmed El Şera 70 endam tayîn kirin.
LI PARLAMENTOYÊ NÛNERÊN ROJAVA Û SUWEYDAYÊ NÎN IN
Li Sûriyeyê hilbijartinên Meclisa Gel di 5’ê Cotmeha 2025’an de hat lidarxistin. Lêbelê ji ber êrişên HTŞ’ê li Bakur û Rojhilatê Sûriyeyê li Siwêdayê hilbijartin pêknehat. Piştî êrişên Hikumeta Demkî, di çarçoveya mutabeqata 24’ê Gulana 2026’an, hilbijartinên ku dihat xwestin li Bakur û Rojhilatê Sûriyeyê bê kirin, ji ber daxwazên Kurdan nehatin cihbicihkirin, gelê herêmê hilbijartin boykot kir û neçû ser sindoqan. Navên ku ji aliyê Hikumeta Demkî hatin diyarkirin neketin parlamentoyê.
