Festîvala Çanda Kurd a 34’emîn wê îsal bi dirûşma “Em bi Rêbertiyê Azad Civaka Demokratîk Ava bikin” 5’ê Îlonê roja Şemiyê li bajarê Dortmund ê Elmanyayê bê lidarxistin. Hevserokê KCDK-E’yê Engîn Sever anî ziman ku amadekariyên festîvalê 6 meh in dewam dike û anî ziman ku îsal ji salên derbasbûyî cudatir, ji bo çand, nasname û zimanê Kurd bêhtir nîşan bidin, ew li ser konsepteke nû dixebitin.
Sever ji rojnameya Yenî Ozgur Polîtîkayê re axivî û diyar kir ku festîval ji sala 1992’an û vir ve li dijî qirkirina çandê qadeke berxwedanê bû û got, “Di festîvalan de ku 34 salan bê navber hatin lidarxistin, îsal li şûna bernameyeke ku bi giranî ji konseran pêk dihat, em ê platformên pir alî ava bikin ku çand, nasname û zimanê Kurd bêhtir nîşan bidin.”
Engîn Sever ragihand ku komîteya amadekar a festîvalê ji tîmek ji 80 kesî pêk tê ku endamên federasyonên Bakurê Fransa, Hollanda, Belçîka, Elmanya, rêxistinên jin û ciwanan, tevgerên çandê, komîteyên dîplomasiyê û çapemenî-weşanê di nav de hene. Sever ragihand ku serlêdanên fermî qediya ne û afîş û bilet jî gihîştine Navendên Civaka Kurd.
Sever anî ziman ku ew dixwazin modela “Hefteyên Çanda Kurd” ên di salên 1990’î de dihatin nîqaşkirin jinûve derbasî meriyetê bikin û got, li bajarên cuda yên Fransa, Belçîka, Îngilistan, Kanada, Awûstûrya, Swîsre û Elmanyayê beriya festîvalê çalakiyên çandê lidar bixin û kombûna fînalê jî 5’ê Îlonê li Dortmundê pêk bînin.
Hevserokê KCDK-E’yê destnîşan kir ku bi çalakiyên xwecihî wê jiyana hevpar a bi gel û çandên cuda xurt bikin û got, wê îsal yekemcar li Festîvalê Bazara Kurdan ava bikin. Hevserokê KCDK-E’yê ragihand ku li binê bi dehan konan wê wêjevan, şêwekar û hilberînerên berhemên destan berhemên xwe nîşan bidin û kincên neteweyî yên Kurdan bêne nîşandan. Sever diyar kir ku ji bo zarokan jî wê qadeke taybet bê avakirin.
Di bernameya dikê ya festîvalê de jî Chopy, Mikaîl Aslan û Cemîl Qoçgîrî, Koma Zerdeştê Kal, Sîpan Xelat, Awaza Botan, Zarok Ma û komên govendê wê hebin.
Sever ragihand ku ew dixwazin festîvalê veguherînin qada kombûna hevpar a çand û gelan û got, di vê çarçoveyê de wê Wezîrê Çandê yê Eyaleta Nordrhein Westfalen (NRW) jî bê vexwendin.
Engîn Sever bang li Kurdistaniyan kir ku bi kincên xwe yên gelêrî beşdarî festîvalê bibin.
