Derket holê ku Aydin Ogûz ê ku dema li Girtîgeha Girtî ya Tîpa L a Espiye ya Gîresûnê spor dikir piyê xwe şikand, ew 21 roj nabin nexweşxaneyê. Aydin Ogûz di 19’ê Tîrmehê de dema ku spor dikir, piyê xwe şikand. Aydin Ogûz ê ku rewşa qewimî û binpêkirinên heyî di çarçoveya mafê telefonê yê heftane de ji malbata xwe re ragihandiye, gotiye ku li ser agahîdayîna hevalên wî ew rakirine rewîra girtîgehê, li rewîrê piştî tedawiya destpêkê ji nexweşxaneyê re hatiye sewqkirin. Li ser vê yekê leşkeran ‘’lêgerîna nava devî’’ lê ferz kirine û ji ber ku wî jî ev yek qebûl nekiriye wî nabin nexweşxaneyê.
Malbatê anî ziman ku Aydin Ogûz ji leşkeran re gotiye, ‘’Ger pirsgirêk ewlehî be ez li cem we kuxiyam û ez dikarim li cem we avê jî vexwim. Lê belê ez vê lêgerîna we ya nava devî qebûl nakim.’’ Hate diyarkirin ku Aydin Ogûz rojekê piştre dîsa ji bo tedawiyê çûye rewîrê û bijîşkê rewîrê ji bo piyê şikestî ‘’sewqa lezgîn’’ nivîsandiye û dema ku ji bo sewqê çûye li ber derî, careke din ji ber ferzkirina leşkeran a ‘’lêgerîna nava devî’’ sewq hatiye astengkirin. Malbatê da zanîn ku roja piyê Aydin Ogûz şikestî bes bi pateyan hatiye pêçandin û bes gopalek danê.
Aydin Ogûz di telefona li gel malbata xwe de diyar kiriye ku ew hê jî ji nexweşxaneyê re nehatiye sewqkirin û ev yek anîne ziman: ‘’Rojên ewilî ji bo piyê min ê şikestî kremek dane min. Piştî ku ev krem bi dawî bû êdî nedan. Her çend werîmînên piyê min hinekî kêm bibin jî êşa wê berdewam dike.’’
