Hunermendên li Amedê li dijî polîtîkayên tiryak, fuhûş û bêesilkirinê ku tevna civakî hedef digre, ketin tevgerê.
Hunermandan destnîşankirin ku huner parçeyek ji berxwedana civakî û têkoşîna heqîqetê ye û ji bo ku li dijî van polîtîkayên ku ciwanan hedef digrin, xetekî têkoşîna hevpar ava bikin li hev civiiyan. Hunermendan ragihandin ku ew ê di qadên çand û hunerê de xebatên berfireh bimeşînin.
Hunermend Elvan Koçer derbarê xebatên ku wê lli dijî tiryak û fuhûşê were meşandin û rola hunerê di têkoşîna civakî de ji ANF’ê re axivî.
‘GIRÊDANBÛNÊN CIVAKÎ HEDEFA POLÎTÎKAYÊN TAYBET E’
Elvan Koçer diyar kir ku di têkoşînên civakî de yek ji rêbazên ku hêzên serwer herî zêde serî lê didin, polîtîkayên şerê taybet e û anî ziman ku hedefa bingehîn a van polîtîkayan qelskirina girêdanbûnên ku dihêle civak hebûna xwe nîşan bide ye.
Elvan got ku dema mirov li dîroka Kurdistanê dinêre, bi rêya şer û komkujiyan xwestine li ser civakê encamên curbecur bigrin, lê gel tevî hemû êrîşan dev ji xaka xwe bernedaye û diyar kir ku polîtîkayên şerê taybet herî zêde jin û ciwanan hedef digrin.”
Elvan Koçber anî ziman ku gelê ku bi hezaran sal in di vê xakê de jiyan dikin, di sed salên dawî de her asta şer jiyan kirin, lê tevî hilweşandinên mezin û komkujiyan jî dev ji xaka xwe bernedan.
‘RIZANDINA CIVAKÎ TÊ FERZKIRIN’
Elvan Koçer anî ziman ku avaniya civakî di roja me de bi rêbazên cuda tê hedefgirtin û wiha got, “Di qonaxa heyî de gor, penaberî yan jî ger bîmîne rizandin û tunebûn li ser gelê me tê ferzkirin. Yek ji encamên pratîka şer a ji rêgezên exlaqî dûr, tiryak û fuhûş in. Bi vî rengî girêdanbûna ciwanên me bi civakê re tê qutkirin, hewl tê dayîn ku kesên bêmecal, ji xwe şerm dike û ji xwe direve were afirandin.
‘HUNER ZEMÎNA BERXWEDANÊ YE’
Elvan Koçer bilêv kir ku huner yek ji qadên bingehîn e ku daneheva dîrokî û çandî ji bo nifşên nû vediguhezîne û wiha got, “Taybetmendiya herî bingehîn a huner û çand ew e ku veguhestineke bi kok û xurt dike. Huner zemîna berxwedanê ye. Herî kêm ji bo civakên ku wekî me têkoşîna civakî dimeşînin, ev yek wiha ye.
Rola hunerê ew e ku tişta rast, civakî û pêşerojê bi paşerojê re tîne ba hev, okên civakê kûr û xurt dike. Em hewl didin vê yekê wiha bizanibin, wiha pêk bînin û berpirsyariyên xwe yên civakî bi cih bînin. Ji ber vê yekê, em wekî hunermendên Kurd erka xwe bi vî rengî bi nav dikin.”
‘BÎRA KOLEKTÎF YA KURDAN XURT E’
Koçer diyar kir ku bîra kolektîf ya gelê Kurd xurt e û wiha got, “Bîra kolektîf ya gelê Kurd û hunermendên wê, hîna pir xurt e. Ji ber vê yekê beramberiya her xebata ku di qada xwe de dimeşîne, pir zû dibîne. Palpişta herî girîng ya vê yekê, di astekî mezin de civakî û kolektîfbûyîna fealiyetên jiyana pratîkî ya Kurdan e.
‘HUNERMEND WÊ XEBATÊN XWE MEZIN BIKIN’
Elvan Koçber diyar kir ku hunermendan di dema pêşiya me de, bi taybet li Amed, bajarên din xebatên xwe mezin bikin û got, “Em ê di vê çarçoveyê de bi taybet li Amedê û bajarên xwe yên din, çalakiyên xwe yên ku wê hêza guherînker, nûker û girêdankirina bi civakê re ya hunerê nîşan bide, zêde bikin. Em ê xebatên ku ciwan xwe bibînin, bimeşînin.”
Elvan Koçber destnîşan kir ku huner dikare di pêvajoyên guherîn û veguherînê de roleke pêşeng bilîze.
