Hat ragihandin ku li gundê Bektaşli ya navçeya Alapliyê ya Zonguldakê, zêdetirî 70 karker û malbatên wan ku ji bo karkeriya findiqan a demsalî ji navçeyên Cizîr û Silopiya yên Şirnexê çûbûn wir, du roj in rastî êrîşan tên.
Wekîlên DEM Partiyê yên Şirnexê, di daxuyaniya xwe ya derbarê êrîşê de diyar kirin ku karker pêr rastî êrîşê hatine û cendermeyan destwerdan kiriye. Lê hate gotin ku karker gava êvarê ji zeviyê vedigeriyan careke din rastî êrîşê hatine û di dema bûyerê de tevî ku cenderme li wir bûn jî rê li ber êrîşê nehatiye girtin.
DU CARAN RASTÎ ÊRÎŞÊ HATIN
Di hevdîtinên wekîlan ên bi Parêzgerê Zonguldakê û Qeymeqamiya Alapliyê re hat xwestin ku ewlehiya canê karkeran bê misogerkirin. Hat daxwazkirin ku zêdetirî 70 karker û malbatên wan bo cihê ewle bên veguhastin an jî li herêma ku lê ne tedbîrên pêwîst bên girtin.
‘PÊVAJOYA EDLÎ HATE DESTPÊKIRIN’
Hat ragihandin ku derbarê êrîşan de ji aliyê Serdozgeriya Komarê ya Alapliyê ve pêvajoya edlî hatiye destpêkirin. Di daxuyaniyê de hate teqezkirin ku ewlehiya canê karkerên demsalî di bin berpirsiyariya meqamên giştî de ye û hate diyar kirin ku dê êrîş bi hemû aliyên xwe ve bê lêkolînkirin û ji bo ku bûyerên mîna hev çênebin dê pêvajo bê şopandin.
